استانا اۋەجايى مەن ۆوكزالدارى كۇشەيتىلگەن جۇمىس رەجيمىنە كوشتى, دەپ حابارلايدى astana-akshamy.kz
بۇل شانحاي ىنتىماقتاستىق ۇيىمى ءسامميتىن وتكىزۋمەن بايلانىستى. وسى كەزەڭدە ەلوردا اۋەجايىندا كۇشەيتىلگەن جانە تاۋلىك بويعى جۇمىس رەجيمى قامتاماسىز ەتىلەتىن بولادى.
كولىك مينيسترلىگى تاراتقان حابارلامادا: «تۇراقتى رەيستەردىڭ ۇشۋى كەستە بويىنشا جوسپارلانعان. ءسامميتتى وتكىزۋ كەزەڭىندە جۇمىسقا سالا ماماندارى مەن ديسپەتچەرلىك قۇرام تارتىلدى. جۇزدەن استام قىزمەتكەر رەزەرۆ رەتىندە جۇمىلدىرىلىپ, ەلوردا اكىمدىگىمەن بىرلەسىپ شەت تىلدەرىن بىلەتىن ەرىكتىلەر تارتىلىپ جاتىر. سونداي-اق الماتى جانە قاراعاندى قالالارىندا قوسىمشا اۋەجايلاردىڭ دايىندىعى كوزدەلگەن.
ەلوردالىق تەمىرجول ۆوكزالدارىنىڭ دايىندىعى تۋرالى ايتا كەلە, شانحاي ىنتىماقتاستىق ۇيىمىن وتكىزۋ شەڭبەرىندە تەمىرجول بەكەتتەرى شتاتتىق رەجيمدە جۇمىس ىستەيتىنىن اتاپ وتكەن ورىندى. بۇگىنگى تاڭدا تەمىرجول كولىگى استانا-1 ستانتسياسىنان 23 باعىت بويىنشا تاۋلىگىنە 11 مىڭعا جۋىق جولاۋشىنى, ال «نۇرلى جول» تەمىرجول ۆوكزالى بويىنشا تاۋلىگىنە 8 مىڭ جولاۋشىنى 19 مارشرۋت بويىنشا تاسىمالداۋدا. ۆوكزالدار كەشەندى قاۋىپسىزدىك جۇيەلەرىمەن جابدىقتالعان», – دەلىنگەن.
سۋرەت: Tengrinews.kz / تۇرار قازانعاپوۆ
