پرەمەر-ءمينيستردىڭ ورىنباسارى – ۇلتتىق ەكونوميكا مينيسترى نۇرلان بايبازاروۆ پەن تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ Astana Hub IT-ستارتاپتار حالىقارالىق تەحنوپاركىن ارالاپ, وعان قاتىسۋشىلارمەن كەزدەستى. سونداي-اق بىرقاتار وتاندىق يننوۆاتسيالىق جوبالارمەن تانىستى.
Astana Hub IT بيزنەس ءۇشىن ەكوجۇيەنى قۇرۋ جانە دامىتۋ, IT ماماندارىن دايارلاۋ ءارى ستارتاپ جوبالاردى قولداۋ بويىنشا بەلسەندى جۇمىس اتقارۋدا. بۇگىنگى تاڭدا تەحنوپاركتە 1,5 مىڭعا جۋىق IT-كومپانيا تىركەلگەن, ونىڭ 400-دەن استامى شەتەلدىكتەردىڭ قاتىسۋىمەن.
ماسەلەن, اlaqan ستارتاپى – الاقان تامىرلارىن تانۋ ارقىلى كونتاكتىسىز تولەم جۇيەسى. نارىقتاعى جوبا 2020 جىلدان باستاپ بۇگىنگى كۇنگە دەيىن 3 ونىمگە يە: Alaqan Pay, Alaqan Mektep جانە Alaqan HR. الاقان جۇيەسىندە 100 مىڭ بەلسەندى تۇتىنۋشى بار. اتالمىش جۇيە ايىنا 1,2 ملن يدەنتيفيكاتسيا ءارى تارتىلعان $300 مىڭ ينۆەستيتسيانى قۇرايدى.
تاعى ءبىر تىڭ جوبا – NeuronOil. بۇل – ماشينالىق وقىتۋمەن ۇڭعىماارالىق ساندىق مودەلدەۋدى قولداناتىن مۇناي كەن ورىندارىن يگەرۋدىڭ ۆەب-ترەناجەرى. تەحنولوگيا جوسپارلانعان ءوندىرىس كولەمىن ساقتاي وتىرىپ, شىعىنداردىڭ ءوسۋىنسىز كۇندەلىكتى مۇناي ءوندىرۋدى ارتتىرۋعا نەمەسە شىعىنداردى ازايتۋعا مۇمكىندىك بەرەدى.
سونداي-اق جاھاندىق ەكسپانسياعا باعىتتالعان, بولاشاعى زور قازاقستاندىق EdTech ستارتاپى CodiPlay-دىڭ جۇمىسى تانىستىرىلدى. جوبا قازاقستان, وزبەكستان, وڭتۇستىك كورەيا, قاتار, ازەربايجان, يندونەزيا جانە ۇلىبريتانيا مەكتەپتەرىن ءوز جۇيەسىنە قوسۋ ارقىلى جاساندى ينتەللەكت پەن ۆيرتۋالدى شىندىقتى پايدالانادى.
كەزدەسۋ بارىسىندا ستارتاپتاردى قولداۋ شارالارى, ناقتى يننوۆاتسيالىق جوبالاردى كوممەرتسيالاندىرۋ, سونداي-اق پرەزيدەنتتىڭ IT-قىزمەتتەر ەكسپورتىنىڭ كولەمىن $1 ملرد-قا دەيىن ارتتىرۋ تۋرالى تاپسىرماسىنا سايكەس ستارتاپتاردى ۆەنچۋرلىق قارجىلاندىرۋ ماسەلەلەرى تالقىلاندى.
