بوكستان استانا كۇنىنە ارنالعان 2010-2011 جىلى تۋعان جاسوسپىرىمدەر اراسىنداعى «Qazaq Arlany» اشىق رەسپۋبليكالىق ءتۋرنيرى باستالدى.
ءتۋرنيردىڭ اشىلۋ سالتاناتىنا ءسوز سويلەگەن قر تۋريزم جəنە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى ازامات يماشەۆ قاتىسۋشىلارعا ساتتىلىك تىلەپ, جارىس شىمىلدىعىن اشىپ بەردى.
سونىمەن قاتار استانا قالاسىنىڭ دەنە شىنىقتىرۋ جəنە سپورت باسقارماسىنىڭ سپورت ءبولىمىنىڭ باسشىسى ازامات اعزاموۆ, «Qazaq Arlany» by M.Toitov بوكس كلۋبىنىڭ نەگىزىن قالاۋشى, بوكستان حالىقارالىق دəرەجەدەگى سپورت شەبەرى, «Astana Arlans» قۇرامىندا WSB نۇسقاسى بويىنشا ەكى دۇركىن əلەم چەمپيونى, «دالا قىراندارى» قوعامدىق بىرلەستىگىنىڭ كوورديناتورى مەيربولات تويتوۆ جانە قازاقستاننىڭ ەڭبەك سىڭىرگەن سپورت شەبەرى, əۋەسقوي بوكستان əلەم چەمپيونى, وليمپيادا ويىندارىنىڭ ەكى دۇركىن كۇمىس جۇلدەگەرى بولات ءجۇمادىلوۆ سياقتى ەلگە تانىمال ازاماتتار ءسوز سويلەپ, قاتىسۋشىلارعا جەڭىس تىلەدى. جالپى جارىسقا قولداۋ كورسەتىپ كەلۋشىلەردىڭ اراسىندا بلوگەر سپورتشىلاردان تارتىپ, الەم چەمپيوندىعىنا دەيىن جەتكەن سپورت شەبەرلەرى بولدى. ال قاتىسۋشىلار وزدەرىنىڭ مۇنداي دەڭگەيدەگى شارشى الاڭدا بوكستاسقاندارىنا قۋانىشتى ەكەنىن جەتكىزىپ, بولاشاق ارماندارىمەن دە ءبولىستى.
– مەن بوكسپەن ءۇش جارىم جىلدان بەرى قاراي اينالىسىپ كەلە جاتىرمىن. وسىعان دەيىن 10-عا جۋىق التىن مەدال الدىم. قازىر جاسىم – 12 دە. بولاشاقتا ماحمۋد سابىرحان, ساكەن بيبوسىنوۆ سياقتى چەمپيون بولعىم كەلەدى. بۇيىرسا, بۇگىنگى جارىستا دا ءوزىمنىڭ مىقتى دايىندالعانىمنىڭ ناتيجەسىن كورسەتەمىن, – دەيدى كىشكەنتاي بوكسشى ارىسبەك نارقوزى.
سونداي-اق جارىسقا قاتىساتىن بالالاردىڭ ءار قيمىلىن باقىلاپ, ولاردى وسى سايىسقا ارنايى دايىنداپ كەلگەن باپكەرلەر وزدەرىنىڭ بولاشاقتان كۇتەتىن ۇمىتتەرى زور ەكەنىن ايتىپ, جارىستى ۇيىمداستىرۋشىلارعا العىس ايتتى.
جالپى بۇل ءدۇبىرلى دوداعا قازاقستاننىڭ بارلىق ايماعىنان 200-گە جۋىق جاس بوكسشىلار قاتىسىپ وتىر. 4 كۇنگە سوزىلاتىن جارىستا جالپى ەسەپتە 15 سالماق دəرەجەسىندە جەڭىمپاز پەن جۇلدەگەرلەر انىقتالاتىن بولادى.
