استانا كۇنىن مەرەكەلەۋ اياسىندا استانا قالاسىنىڭ اكىمدىگى مەن ەركەعالي راحماديەۆ اتىنداعى مەملەكەتتىك اكادەميالىق فيلارمونياسى بىرلەسە «FILARMONIA FESت – 2024» جوباسىن ۇسىندى.
فيلارمونيانىڭ باس ديرەكتورى ەرلان داكەنوۆ شىعارماشىلىق ۇجىمىنىڭ جەتىستىگىنە توقتالىپ, حالىقتىڭ رۋحاني كەمەلدىلىگىن ارتتىرۋدا تىنباي ەڭبەكتەنىپ كەلە جاتقاندىقتارىن ءارى بۇل جولى ارنايى ەلوردا كۇنىنە وراي ۇيىمداستىرىلعان مۋزىكالىق ءىس-شارانىڭ ورنى ەرەكشە ەكەندىگىن ايتادى.
– ءبىزدىڭ فيلارمونيا – ءحىح عاسىردىڭ باسىنان بەرى ونەردىڭ تامىرى سوعىپ تۇرعان قالانىڭ مۋزىكالىق جۇرەگى, ەلورداداعى ەرتەدەن كەلە جاتقان مادەنيەت مەكەمەلەرىنىڭ ءبىرى. بۇگىنگى تاڭدا فيلارمونيا قۇرامىندا 13 شىعارماشىلىق ۇجىم جەمىستى ەڭبەك ەتۋدە. قىزمەتكەرلەر سانى 600 ادامدى قۇرايدى. ەلوردالىق فيلارمونيانىڭ مىندەتى – ءارتۇرلى باعىتتاعى مۋزىكالىق شىعارمالاردى ناسيحاتتاي وتىرىپ, جوعارى اعارتۋشىلىق قىزمەتتى ورىنداۋ, اعارتۋشىلىق جانە مادەني قۇندىلىقتاردى ناسيحاتتاۋ, وسكەلەڭ ۇرپاقتى تاربيەلەۋ, ۇلتتىق جانە الەمدىك ونەردىڭ رۋحاني مۇراسىن ساقتاۋ جانە كوبەيتۋ. ال وسىنىڭ ءبارىن استانالىق فيلارمونيا تولىق كولەمدە جۇزەگە اسىرىپ كەلەدى, – دەيدى اتالعان فيلارمونيانىڭ باس ديرەكتورى.
شىنىمەن دە ءداستۇرلى تۇردە جىل سايىن ۇيىمداستىرىلاتىن اۋقىمدى مۋزىكا مەرەكەسى قوعامدا مەرەكەلىك اتموسفەرا مەن جاعىمدى كوڭىل-كۇي قالىپتاستىرىپ, فيلارمونيانىڭ شىعارماشىلىق ۇجىمدارىنىڭ شىعارماشىلىعىن تانىمال ەتىپ, جەكە برەندتى قالىپتاستىرۋعا, وتباسىلىق قۇندىلىقتاردى دامىتۋعا, وسكەلەڭ ۇرپاقتىڭ ادامگەرشىلىك جانە كوركەمدىك باعدارلارىن ايقىنداۋعا جۇمىس ىستەپ كەلەدى.
تاعى ءبىر ايتا كەتەتىن جايت, جوبا اياسىندا «بورمەن سۋرەت سالۋ» جانە «كەسكىندەمە» اتتى ەكى نوميناتسيادا ۇزدىك جۇمىستاردى ماراپاتتاۋمەن قاتار, «مۋزىكا بالالار كوزىمەن» بالالار سۋرەت بايقاۋى, «سارىارقا» حالىق مۋزىكاسى ءانسامبلىنىڭ جانە سيمفونيالىق وركەستردىڭ «مۋزىكالىق اسپاپتار الەمىنە ساياحات» اتتى جاس مۋزىكانتتارعا ارنالعان شەبەرلىك ساعاتتارى جانە فيلارمونيا الاڭىندا فيلارمونيانىڭ بارلىق ۇجىمدارىنىڭ قاتىسۋىمەن ەلوردانىڭ 26 جىلدىعىنا ارنالعان 26 سانىن قۇرۋمەن جاپپاي فلەشموب ۇيىمداستىرىلدى. سونداي-اق فيلارمونيا ۇجىمدارىنىڭ قاتىسۋىمەن ەسىل وزەنىنىڭ جاعاسىندا جانە ەلوردالىق اربات بويىندا مۋزىكالىق شەرۋ ءوتتى.
شاپاعات ءابدىر
