استانا كۇنىنە وراي بۇقارالىق ۆەلوشەرۋ ۇيىمداستىرىلدى, دەپ حابارلايدى astana-akshamy.kz
ۆەلوسيپەد ماۋسىمى باستالعالى بەرى «جاسىل بەلدەۋ» اۋماعىندا ءتورتىنشى مارتە بۇقارالىق ۆەلوشەرۋ وتكىزىلىپ جاتىر.
جاز مەزگىلى مەكتەپ وقۋشىلارى مەن كوپتەگەن قىزمەتكەرلەردىڭ دەمالىس ۋاقىتىنا سايكەس كەلگەندىكتەن, ۇلكەن قالالارعا اعىلاتىنى بەلگىلى. كەزەكتى ۆەلوشەرۋگە وسى ماۋسىمداعى ەڭ كوپ 605 اۋەسقوي سپورتشى باس قوستى.
ءداستۇرلى 25 شاقىرىمدىق قاشىقتىقتى باعىندىرۋعا قاتىسۋشىلار ۇركەر ەلدى مەكەنىنىڭ «جاسىل بەلدەۋ» ساياباعىنا دەيىنگى ارالىقتى ءجۇرىپ ءوتتى.
بۇگىنگى ۆەلوشەرۋگە استانا قالاسىنىڭ تۇرعىندارىنان بولەك, اقمولا, الماتى, اتىراۋ, جامبىل, پاۆلودار وبلىستارى جانە شىمكەنت قالاسىنان دا قاتىستى.
«اتىراۋ وبلىسىنان كەلدىم. قازىرگى ۋاقىتتا استانادا وقۋ-جاتتىعۋ جيىندارىن وتكىزىپ جاتىرمىز. الداعى كۇندەرى ۆەلوشوسسەدەن چەمپيوناتقا قاتىسامىز. بۇگىن دەمالىس بولعاندىقتان, جاتتىعۋدان بولەك, «جاسىل بەلدەۋدى» دە كوردىم. جاپ-جاسىل. اۋاسى تازا, تىپ-تىنىش. جول بويى كەرەمەت سۋرەتتەرگە ءتۇسىپ كەلدىك. قالا كۇنى ۋاقىتىنا تۇسپا-تۇس كەلگەنىمىزگە قۋانىشتىمىن!» – دەدى جانتىلەك جولداس.
سونداي-اق, قاتىسۋشىلار اراسىندا لوتەرەيا ويناتىلىپ, ناتيجەسىندە 10 ادام ۆەلوسيپەد ۇتىپ الدى.
«استانا قالاسى جىل سايىن كەڭەيىپ, سپورت ورتالىعىنا اينالىپ كەلەدى. ءار اپتا سايىن بۇقارالىق جۇگىرۋ, ۆەلوسپورت ت.ب جارىستار ءجيى وتەدى. ال «جاسىل بەلدەۋدىڭ» ورنى بولەك. كادىمگىدەي سەرگىپ قالاسىڭ. اۋا رايى دا وتە قولايلى بولدى. ءىس-شارا سوڭىندا لوتەرەيادان ۆەلوسيپەد تە ۇتىپ الدىم. بۇل دا مەن ءۇشىن قوسىمشا قۋانىش. بارشاڭىزدى كەلە جاتقان قالا كۇنىمەن قۇتتىقتايمىن!» – دەپ قالا تۇرعىنى سەرىك حالەلوۆ ءوز قۋانىشىمەن ءبولىستى.
مەرەكەنىڭ سوڭىندا ءداستۇر بويىنشا بارلىق قاتىسۋشىلارعا پالاۋ مەن ءتاتتى كومپوت تاراتىلدى.
