وتاندىق پاراسپورتتىڭ اراسىندا ەڭ مىقتى جەتىستىگىمەن تانىمال پاراپاۋەرليفتينگتەن استانا قالاسىنىڭ كۋبوگى ءوتتى.
پاراپاۋەرليفتينگ سپورتىن 2016 جىلى ريو پاراليمپياداسىندا العاش رەت ەستىدىك. سەبەبى ءدال سول كەزدە وسى سپورتتان راۋشان قويشىباەۆا تاريحي ءبىرىنشى كۇمىس جۇلدەنى يەلەنگەن بولاتىن. ال توكيو پاراليمپياداسىندا داۆيد دەگتيارەۆ بۇل كورسەتكىشتى جاڭارتىپ, چەمپيون اتاندى. سوندىقتان دا بۇل سپورت ءتۇرى ەلىمىزدە تانىمال. وسىعان وراي ەلوردا تورىندە پاراپاۋەرليفتينگتى ودان ءارى كەڭىنەن دامىتۋ ماقساتىندا تىرەك-قيمىل اپپاراتى زاقىمدانعان سپورتشىلار اراسىندا ءبىرىنشى رەت استانا قالاسىنىڭ كۋبوگى وتكىزىلىپ وتىر.
«پاراپاۋەرليفتينگتەن جارىستار ەلىمىزدە تۇراقتى تۇردە ۇيىمداستىرىلادى. ال كۋبوكتىك باسەكەلەردىڭ وتكىزىلىپ جاتقانىنا كوپ بولمادى. ءبىرىنشىسى قاراعاندىدا, كەيىن پاۆلودار مەن الماتىدا ءوتتى. ەندى استانا قالاسىندا دا باستاۋ الدى. وسى تۋرنير ارقىلى قالاداعى ۇزدىكتەر سۇرىپتالىپ, ءىرى حالىقارالىق جارىستارعا باراتىن سپورتشىلار انىقتالادى» دەدى جارىستىڭ ۇيىمداستىرۋشىسى گۇلنار احمولدينا.
بۇل دودادا استانا قالاسىنان بولەك, ەكىباستۇزدان جالپى 26 پاراسپورتشى باس قوستى. «2016 جىلدان بەرى وسى سپورت تۇرىمەن اينالىسىپ ءجۇرمىن. 8 جىل ىشىندە قازاقستاننىڭ بىرنەشە دۇركىن چەمپيونى بولدىم. الداعى اپتادا تاراز قالاسىندا رەسپۋبليكالىق باسەكەدە باق سىنايتىن بولامىز. بۇگىنگى تۋرنير سونىڭ الدىنداعى دايىندىعىمىزدى پىسىقتاۋ. ارينە, وسى دەڭگەيلى تۋرنيرلەردىڭ كوپتەپ ءوتۋى سپورتشىلاردىڭ جارىس اتموسفەراسىن سەزىنۋگە, فيزيكالىق دايىندىقتى ارتتىرۋعا سەپتىگىن تيگىزەدى» دەدى سۇيىندىك تەمىربەۋۇلى اتتى قاتىسۋشىسى.
پاراپاۋەرليفتينگ سپورتىنان 2023 جىلى جازعى ازيا پارا ويىندارىندا جەرلەستەرىمىز 1 التىن, 2 كۇمىس, 2 قولا جۇلدە يەلەنگەن بولاتىن.
