استانا قالاسىنداعى يندۋستريالدى پاركتەگى كاسىپورىنداردا اقش, فرانتسيا, شۆەيتساريا, تۇركيا, رەسەي, پولشا ەلدەرى كومپانيالارىنان ينۆەستيتسيا تارتىلىپ, جۇمىس جۇرگىزىلۋدە. بۇگىنگى تاڭدا رەسپۋبليكالىق جالپى ىشكى ءونىمنىڭ 11 پايىزدان استامى ەلوردادا شىعارىلسا, نەگىزگى كاپيتالعا سالىناتىن ينۆەستيتسيانىڭ 10 پايىزى دا باس قالادا وتىر.
«قۋاتتى وڭىرلەر – ەل دامۋىنىڭ درايۆەرى» جوباسى اياسىندا ىسكە قوسىلعان يندۋستريالدى پارككە ارنايى باردىق. دەلەگاتسيا قۇرامىندا قىرعىزستاننان كەلگەن ىسكەر ازاماتتار بار. Astana Invest – قالالىق ينۆەستيتسيالاردى دامىتۋ ورتالىعىنىڭ باسقارما توراعاسى اسحات بەكەەۆ پاركتىڭ جۇمىسىمەن تانىستىرىپ, زاۋىتتارعا جول باستادى.
استانا ەلدىڭ ەكونوميكاسىنداعى ورنى ەرەكشە. رەسپۋبليكانىڭ جالپى ىشكى ءونىمىنىڭ 11 پايىزدان استامى شىعارىلادى جانە نەگىزگى كاپيتالعا سالىناتىن ينۆەستيتسيانىڭ 10 پايىزى قالىپتاسادى.
«استانا – جاڭا قالا» قۇرىلعالى ءوندىرىس كولەمى 7 434 ميلليارد تەڭگەگە جەتتى. ەكسپورت كولەمى 140,15 ميلليارد تەڭگەنى قۇرايدى.
سوڭعى جىلدارى قالانىڭ جالپى وڭىرلىك ءونىمى 272 ەسەدەن استام ءوسىپ, 25,7 ميلليون تەڭگەدەن 7 تريلليون تەڭگەگە جەتتى. 1997 جىلدان بەرى ونەركاسىپ ءوندىرىسىنىڭ كورسەتكىشى 50 ەسەگە ءوستى. بۇل رەتتە, يندۋستريالدى پارك قوزعاۋشى كۇشكە اينالدى.
– №1 يندۋستريالدى پارك كولەمى 653 گەكتاردى قۇرايدى جانە ول 15,4 مىڭ گەكتار قۇرايتىن «استانا – جاڭا قالا» قۇرامىنا كىرەدى. «استانا – تەحنوپوليس» كىرەدى. №1 يندۋستريالدى پاركتە ينۆەستيتسيالىق پورتفەلى ناقتى سالىنعان 112 جوبانى قۇرايدى. 2023 جىلى ارنايى ەكونوميكالىق اۋماقتا 8,59 ميلليارد تەڭگەنى قۇرايتىن 7 جوبا پايدالانۋعا بەرىلدى. 2024 جىلى 19,8 ميلليارد تەڭگەنىڭ 10 جوباسىن ىسكە قوسىپ, 256 جۇمىس ورنىن قۇرۋ جوسپارلانۋدا, – دەدى اسحات بەكەەۆ.
قىرعىزستاننان ارنايى كەلگەن دەلەگاتسيا وكىلدەرى بيىل ىسكە قوسىلاتىن جوبالارعا قىزىعۋشىلىق تانىتتى. اتاپ ايتساق:
– «Ashina» جشس تىگىن فابريكاسىن, «ASIA Tech LOGISTICS» جشس اعاش قۇرامى بار پليتالاردان بۇيىمدار وندىرەتىن تسەح, «DAT KZ» جشس تالشىقتى تسەمەنت پليتالارى مەن گازدالعان بەتون بلوكتارىن شىعاراتىن زاۋىتتى سالۋدى باستاپ كەتتى. ەلوردادا قۇرىلىسى قارقىندى تۇردە دامۋدا, ونىڭ ىشىندە تۇرعىن ءۇي قۇرىلىسى جىلدام ءجۇرىپ, ليفتكە دەگەن سۇرانىس ارتا ءتۇستى. نارىقتاعى سۇرانىستى «لس گرۋپپ» جشس قاناعاتتاندىرۋعا تاۋەكەل ەتتى. «DUAYEN» جشس جەكە قورعانىس قۇرالدارى مەن دەزينفەكتسيالاۋ قۇرالىن, «Baykonur kurylys» تەمىرجول جىلجىمالى قۇرامى قالىپتارىن وندىرەدى. ال «Led System Media» جشس كوكونىستەر, سالاتتار وڭدەۋ جانە كونسەرۆىلەۋ تسەحىن, «LED Solutions» جشس كابەلدىك-جارىقديودتى ءونىم ءوندىرىسىن كەڭەيتۋ جوسپارلاپ وتىر, – دەدى ينۆەستيتسيالىق ورتالىقتىڭ باسقارما توراعاسى.
ساپالى ءونىم سۇرانىسقا يە
ءبىرىنشى وبەكت – «بىرىڭعاي شوعىرلاندىرۋ ورتالىعى» جشس زاۋىتى بولدى. №1 يندۋستريالدى پاركتە ورنالاسقان زاۋىت رەزەڭكە جانە پلاستماسسا بۇيىمدارىن وندىرەدى. كاسىپورىن جىل سايىن 72 ميلليون باقىلاۋ-ينديكاتور پلومبالارى مەن وزدىگىنەن جابىساتىن لەيبلدەر, 24 ميلليون دانا مال شارۋاشىلىعىندا قولدانىلاتىن سىرعا شىعارادى. سەرىكتەستىكتىڭ نەگىزگى ءونىمىنىڭ ءبىرى – پوليپروپيلەن قاپتار.
ءبىز قىرعىزستاندىق دەلەگاتسيامەن بىرگە قاپتاردى قالاي شىعاراتىنىن كوردىك. زاۋىت ديرەكتورى زاميرا كۇزيەۆانىڭ سوزىنشە, «ۋنيۆەرسال» جشس كومپانيالار توبى 80-نەن استام ءونىم ءتۇرىن شىعارادى. جۇگەرى ءدانىن تەرەڭ وڭدەۋمەن بىرگە, كراحمال جانە كراحمالدىڭ قانتقا اينالىپ ۇلگەرمەگەن ءتۇرىن وندىرەدى.
– قاپتاردىڭ شيكىزاتى – پوليپروپيلەن. مۇناي ونىمدەرىنەن جاسالاتىن سينتەتيكالىق ماتەريال. پوليمەرلىك قاپتار ەكولوگيالىق تازا بولىپ كەلەدى. جوعارى تەحنولوگيالىق ساپادا وندىرىلەدى. وڭايلىقپەن جىرتىلمايدى. ءبىزدىڭ ونىمدەرگە رەسەي, گرۋزيا, ليتۆا, ەستونيا, وزبەكستان جانە قىرعىزستاننان سۇرانىس جوعارى. وزگە الىس-جاقىن شەت ەلدەرگە ەكسپورتتاۋدىڭ جولىن ىزدەپ, الەمدىك نارىقتى زەرتتەۋدەمىز. قاپتاردى اۋىلشارۋاشىلىعى داقىلدارى مەن قۇرىلىس زاتتارىنا كەڭىنەن قولدانۋعا بولادى, – دەدى زاۋىت ديرەكتورى.
پوليپروپيلەندى جىپكە اينالدىرىپ, سوسىن جىپتەن قاپ توقيدى ەكەن. قىرعىزستاننان كەلگەن ىسكەر ازاماتتار ءوندىرىستى كوزبەن كورىپ, قىزىقتىرعان سۇراقتارىن جولداپ, ءتيىستى جاۋابىن الدى.
زاۋىتتىڭ ەكىنشى بلوگىندا مال شارۋاشىلىعىندا قولداناتىن سىرعا مەن ەسەپتەگىش قۇرالدارعا ارنالعان پلومبالار شىعارادى. زاۋىتتىڭ ونىمدەرى نارىقتا سۇرانىسقا يە. ەڭ قاراپايىمى, ەلەكتر ەنەرگياسى مەن سۋ شىعىنىن كورسەتەتىن ەسەپتەگىش پلومبا ورناتۋ مىندەتتى. ەگەر ەسەپتەگىش پلومبالانباعان بولسا, وندا ايىپپۇل ارقالايسىز. مال شارۋاشىلىعى سالاسىندا سىرعاعا سۇرانىس جوعارى. ويتكەنى سىرعالانعان ءتورت تۇلىكتى مەملەكەت ءوز كەپىلدىگىنە الادى. سۋ تاسقىنى سالدارىنان ولگەن ءتورت تۇلىككە وتەماقى بەرۋدە سىرعالار تالاپ ەتىلەدى.
زاۋىتتىڭ جوبالىق قۇنى – 2,4 ميلليارد تەڭگە, وندا 150 ادام ەكى قولعا ءبىر كۇرەك تاۋىپ, تۇراقتى جۇمىس ىستەيدى.
ەلەكترونيكا سالاسىنداعى بىرەگەي زاۋىت
ەلەكترونيكا سالاسىندا ءونىم وندىرەتىن قازاقستاندىق بىرەگەي كومپانيا – Cuman. كەڭسەدە جانە ۇيدە قولداۋعا ارنالعان كوممۋتاتور, مودەم, تەلەفون اپپاراتى جانە ستانتسياسىن شىعارادى.
– 2005 جىلى كومپانيا قۇرىلىپ, سەرۆيستىك قىزمەت كورسەتۋمەن جانە جەلىلىك جابدىقتى بىرىكتىرۋمەن اينالىستىق. 2018 جىلى №1 يندۋستريالدى پارك ايماعىندا زاۋىت سالىنىپ, cuman برەندىمەن ءونىم وندىرەمىز. زاماناۋي تەحنولوگيانى مەڭگەرىپ, يننوۆاتسيالىق جوبالاردى شىعارۋ ءبىزدىڭ قولدان كەلەدى. بۇگىندە زاۋىتتىڭ بىلىكتى ماماندارى باعدارلامانى قامتاماسىز ەتەتىن وپەراتسيالىق جۇيە مەن سحەمالاردى وزدەرى جاسايدى. ءوندىرىستىڭ بارلىق كەزەڭدەرىندە ءونىم ساپاسىن باقىلاۋ جوعارى ساپالى ءونىم شىعارۋعا مۇمكىندىك بەرەدى, – دەدى زاۋىتتىڭ كوممەرتسيالىق ديرەكتورى داستان ابدراحمانوۆ.
ءوندىرىس ورنى بەس بلوكتان تۇرادى. ديرەكتور جول باستاپ, زاۋىتتىڭ قىزمەتىمەن تانىستىردى.
– قازاقستاندىقتاردىڭ وي-ءورىسىن وزگەرتىپ, وتاندىق برەندتىڭ شەتەلدىك ونىممەن باسەكەگە تۇسە الاتىنىن كورسەتكىمىز كەلەدى. ءبىزدىڭ كوماندادا 150 ادام بار. ونىڭ 80-ءى ءوندىرىس ورنىندا قىزمەت ەتەدى. ءار بلوكتا جۇمىس ىستەيتىن ماماندار وزدەرىنىڭ جۇمىسىن جاقسى بىلەدى, – دەدى ول.
ءبىرىنشى بلوكتا – اپپاراتتىڭ قانقاسى, ياعني پلاستيكالىق قوندىرعىلار دايىندالادى. پلاستيك شيكىزاتتار – كورەيادان, ال پلاتا شيكىزاتى قىتايدان كەلەدى. ارنايى قالىپتا پلاستيكتى جوعارى تەمپەراتۋرادا بالقىتۋ, پرەستەۋ جۇرگىزىلەدى. ەكىنشى بلوكتا – ماڭىزدى ءبولىم. وندا شۆەتسيا, كورەيا اپپاراتتارى بويىنشا پلاتا شىعارادى. ءوندىرىس تىزبەگى وتە كۇردەلى. اۆتوماتتى وپتيكالىق تەكسەرۋ, باسپا پلاتاسىن بىرنەشە رەت سۋرەتكە ءتۇسىرۋ جانە ونى تۇپنۇسقامەن سالىستىرۋ ۇزدىكسىز جۇرەدى. بۇل پروتسەدۋرا جوعارى ساپانى جانە ەشقانداي اقاۋدىڭ بولماۋىن قامتاماسىز ەتۋگە مۇمكىندىك بەرەدى.
ءۇشىن بلوك – قولمەن دانەكەرلەۋ سەكتسياسىندا تەحنولوگيالارعا «جان بىتەدى». پلاتالاردىڭ جىلدامدىعىن, ساپاسىن تەستىلەپ, تەكسەرەدى. سوسىن پلاستيكتەن ارنايى دايىندالعان كورپۋستارعا پلاتالاردى ورنالاستىرىپ, سىمدارىن جالعاپ, چيپتەردى كودىمەن جيناپ, ىسكە جارامدى اپپاراتقا اينالدىرادى. ءتورتىنشى بلوكتا اپپاراتتاردىڭ ساپاسى باقىلانادى. مۇندا تەستىلەۋ بىرنەشە كەزەڭگە بولىنەدى. ەڭ الدىمەن, باقىلاۋ نۇكتەلەرىندەگى ەلەكترلىك پارامەترلەردىڭ ماندەرىنىڭ ازىرلەنگەن سحەماعا سايكەستىگى تەكسەرىلەدى. بۇل وندىرىلگەن تاقتانىڭ 100 پايىز ساپاعا ساي ەكەنىن راستايدى. سوڭعى بلوكتا وندىرىلگەن ءونىمدى نارىققا شىعارۋعا دايىنداپ, ارنايى قوراپتارعا سالادى.
– تاۋلىگىنە 1 مىڭ تەلەفون اپپاراتىن شىعارا الامىز. شەتەلدىك جانە وتاندىق كومپانيالار كوممۋتاتور, مودەم, تەلەفون اپپاراتىن شىعارۋعا نيەت بىلدىرسە, تاجىريبە الماسۋعا دايىنبىز. قىرعىزستاندىق ارىپتەستەر اراسىندا زاماناۋي تەحنولوگيانى يگەرۋگە نيەت تانىتسا, قولدايمىز. شەتەل نارىعىن باعىندىرۋعا دا الەۋەتىمىز جەتەدى, – دەدى داستان ابدراحمانوۆ.
شەتەل ونىمدەرىمەن باسەكەگە قابىلەتتى
قالالىق ينۆەستيتسيالاردى دامىتۋ ورتالىعىنىڭ باسقارما توراعاسى اسحات بەكەەۆتىڭ سوزىنشە, ارنايى ەكونوميكالىق ايماقتىڭ ينۆەستورلارعا تارتىمدى بولۋىنىڭ ءبىر سەبەبى – لوگيستيكالىق قىزمەتى جاقسى دامىعان, تەمىرجول جەلىسى كەلىپ تۇر. ەگەر كومپانيالار ءوندىرىستىڭ قۋاتىن ارتتىرىپ, سىرتقا ەكسپورتتاعىسى كەلسە, وندا تەمىرجول جەلىسىن زاۋىتقا دەيىن تارتىپ الۋعا مۇمكىندىگى مول. سونداي ەكى كومپانيانىڭ جۇمىسىمەن دە تانىستىق. ءبىرىنشى ءوندىرىس ورنى – تەز پىسەتىن كەسپە ونىمدەرىن شىعاراتىن «كپك «KazBrand» كومپانياسىنىڭ زاۋىتى. جىلىنا 200 ميلليون دانا «كەسپەباي» كەسپەلەرىن دايىندايدى. سەرىكتەستىكتىڭ باس ديرەكتورى الماز زاريپوۆتىڭ ايتۋىنشا, كومبينات الدىمەن كەسپە شىعارۋدى باستادى, ەندى الداعى ۋاقىتتا وسى ءونىم ءتۇرىنىڭ اسسورتيمەنتىن كەڭەيتىپ, ءتۇرلى تۇزدىقتار مەن دامدەۋىشتەر ءوندىرۋدى جوسپارلاپ وتىر.
– كاسىپورىندا كەسپەنىڭ ەكى برەندى بار. «كەسپەباي» – وتاندىق باعىتقا ارنالعان, باعاسى شەتەلدىك ونىمدەرگە قاراعاندا ارزان, «Bastoo» – ەكسپورتقا شىعارۋعا ارنالعان ءونىم, – دەيدى ول.
ەكىنشىسى ءوندىرىس ورنى – LED شامدار شىعاراتىن «Led system media» جشس. 2023 جىلى كومپانيا 70 ميلليون تەڭگەنىڭ ءونىمى ءوندىرىلىپ, مەملەكەتكە 23 ميلليون تەڭگەنىڭ سالىعىن تولەدى.
زاۋىت وندىرەتىن جارىق ديودتى قۇرايتىن جارىقتاندىرۋ قۇرىلعىلارى ەلەكتر قۋاتىن 3,5 ەسەگە دەيىن ۇنەمدەۋگە مۇمكىندىك بەرەدى. بۇل قۇرىلعىلاردى پايدالانۋ مەرزىمى 15 جىلعا جەتەدى. ارتىقشىلىعى, ونىمدەر ەكولوگيالىق تۇرعىدان تازا ءارى قاۋىپسىز. كومپانيا ديودتى شامداردى «Semileds» (اقش) تەحنولوگياسى بويىنشا وندىرەدى.
– ءبىزدىڭ ءونىم بىرنەشە دەڭگەيگە بولىنگەن. ولاردىڭ ءبىرى – جوعارى تەحنولوگيالىق ءبولىم. مۇندا جارىق ديودتاردىڭ ءوزى ءوندىرىلىپ, دايىن ونىمدەر تاقتاعا ورناتىلادى, تولىمداۋىشتار جاسالىپ, قۇراستىرىلادى. بۇگىنگى تاڭدا مەملەكەت تاراپىنان كورسەتىلگەن قولداۋ مەن يە بولعان گرانتتىڭ ارقاسىندا ءبىز ءوندىرىستىڭ ۆەرتيكالدى تۇردە قۇرىلىمىن قۇردىق, – دەپ اتاپ ءوتتى كومپانيانىڭ قۇرىلتايشىسى مارات ابىكاەۆ.
P.S: يندۋستريالدى پاركتە اقش, فرانتسيا, شۆەيتساريا, تۇركيا, رەسەي, پولشا كومپانيالارى ينۆەستيتسيا قۇيىپ, جۇمىس ىستەۋدە ەكەن. بۇل وتاندىق ءونىم وندىرۋشىلەردىڭ شەتەل كومپانيالارىمەن تاجىريبە الماسىپ, جۇمىس ساپاسىن ارتتىرۋعا سەپتىگى تيەتىنى انىق.
