بيىل 25 اقپان مەن 3 ناۋرىزدا «استانا وپەرا» تەاترىندا ەلوردا تۇرعىندارى مەن قوناقتارىنا ارنالعان ەرەكشە گالا-كەش وتەدى. كونتسەرتتىڭ بىرەگەيلىلىگى – وتاندىق بالەتمەيستەرلەردىڭ قويىلىمىنداعى ۇلتتىق نومىرلەردىڭ پرەمەرالارى وتەتىندىگى, دەپ حابارلايدى astana-akshamy.kz.
ەكى كۇندە دە بەلگىلى مۋزىكانت ەلمار بورىباەۆ ديريجەرلىق ەتەدى. Hassak ەتنو-فولكلورلىق ءانسامبلىنىڭ «امانات» مۋزىكالىق كومپوزيتسياسىنا RUH اۋقىمدى ۇلتتىق ءنومىرى جاس بالەتمەيستەر, تەاتر ءسوليسى سۇلتانبەك عۇماردىڭ حورەوگرافياسىندا ۇسىنىلادى. تەاتر ديزاينەرى داريعا تايشىقوۆانىڭ ەسكيزدەرى بويىنشا «استانا وپەرا» تىگىن تسەحى ورىنداۋشىلار ءۇشىن جيىرماعا جۋىق كوستيۋم ازىرلەدى.
كەشتىڭ تاعى ءبىر پرەمەراسى تانىمال حورەوگراف انۆارا سادىكوۆا قويعان «اڭساۋ» دۋەتى بولماق. ونى تەاتردىڭ جەتەكشى ءسوليسى, قازاقستاننىڭ ەڭبەك سىڭىرگەن قايراتكەرى انەل رۇستەموۆا مەن ترۋپپا ءسوليسى جاقسىلىق ساۋقىمبەكوۆ ورىنداۋعا ازىرلەنۋدە. بالەتمەيستەردىڭ سوزىنشە, ارتىستەر دەنە پلاستيكاسى ارقىلى عاشىقتاردىڭ ايىرىلىسار الدىنداعى ءبىر-ءبىرىن اڭساۋ سەزىمىن جەتكىزۋى كەرەك.
ەكى بولىمنەن تۇراتىن گالا-بالەت – ءتۇرلى تاقىرىپتاردىڭ, داۋىرلەردىڭ جانە كورنەكتى حورەوگرافتاردىڭ ونەرگە دەگەن كوزقاراستارىنىڭ ۇيلەسىمى. قازاقستاننىڭ ەڭبەك سىڭىرگەن قايراتكەرلەرى ايگەرىم بەكەتاەۆا, ءمادينا ونەرباەۆا, انەل رۇستەموۆا, باقتيار ادامجان, ەركىن راحماتۋللاەۆ, حالىقارالىق بايقاۋلاردىڭ لاۋرەاتتارى ولجاس تارلانوۆ, ارمان ۋرازوۆ سىندى ورىنداۋشىلار ەموتسيا مەن شەبەرلىگى ارقىلى باعدارلامانى ءار كورەرمەنگە ايقىن ءارى تۇسىنىكتى ەتپەك. ولاردىڭ ارىپتەستەرى – تاماشا سوليستەر مەن ارتىستەر: شۇعىلا ادەپحان, اناستاسيا زاكلينسكايا, ليمارا ايداروۆا, كاميلا شاحمانوۆا, ۆەگا كامار يكبالوۆا, الينا زىريانوۆا, ءمولدىر شاكىموۆا, ادەلينا تۋلەپوۆا, كەشتىڭ دەبيۋتانتى عازيزا مولداحمەت, سۇلتانبەك عۇمار, ايبار توقتار, دياس قۇرمانعازى, دانيار جۇماتاەۆ, الەكساندر كورنيلوۆ, عالىمجان نۇرمۇحامەت, جاقسىلىق ساۋقىمبەكوۆ, ايدان قالجان, اكبار يمينوۆ كلاسسيكادان باستاپ قازىرگى زامانعا دەيىنگى ءتۇرلى بەينەلەردى سومداپ, كورەرمەنگە ۇمىتىلماس اسەر قالدىرادى. گالا-كەشتىڭ باستى ەرەكشەلىگى – الەمدىك بالەت جۇلدىزى التىناي اسىلمۇراتوۆا جاساعان باعدارلاما تۇجىرىمداماسىندا كورىنىس تاپقان مادەني سان الۋاندىق بولعالى تۇر.
