استانادا 15 ماۋسىمنان 16 ماۋسىمعا قاراعان ءتۇنى ش.ايتماتوۆ كوشەسىندە Bus Lane قوعامدىق كولىگى ءۇشىن بولىنگەن جولاق ەنگىزىلەدى. ول ش.قوسشىعۇلۇلى كوشەسىنەن ج.مولداعاليەۆ كوشەسىنە دەيىنگى ۋچاسكەنى قامتيدى, جالپى ۇزىندىعى 10,5 كم بولادى, دەپ حابارلايدى astana-akshamy.kz.
قازىرگى ۋاقىتتا كورسەتىلگەن ۋچاسكەدە جولاقتاردى سىزۋ جۇمىستارى جۇرگىزىلىپ جاتىر.
بۇل – وسى جىلى 7 ۋچاسكەدە ەنگىزىلەتىن Bus Lane جولاقتاردىڭ العاشقىسى. بۇعان دەيىن حابارلاعانداي, بولىنگەن جولاقتار ماڭگىلىك ەل, تۇران, تاۋەلسىزدىك داڭعىلدارى مەن كەرەي جانىبەك حاندار كوشەسىنە, ۇلى دالا جانە ر.قوشقارباەۆ داڭعىلدارىنا ەنگىزىلەدى.
Bus Lane قوعامدىق كولىكتەر قوزعالىسىنىڭ جول ءجۇرۋ ۋاقىتىن, ارالىقتى, ايالدامالاردا جولاۋشىلاردىڭ اۆتوبۋستاردى كۇتۋ ۋاقىتىن قىسقارتۋعا, ورتاشا پايدالانۋ جىلدامدىعىن ارتتىرۋعا ىقپال ەتەدى.سونداي-اق جەدەل جاردەم قىزمەتى, ارنايى قىزمەتتەر مەن ءورت ءسوندىرۋ كولىكتەرىنىڭ كەدەرگىسىز قوزعالىسىن قامتاماسىز ەتۋگە مۇمكىندىك بەرەدى.
