استانادا ايەلدەر كوماندالارى اراسىنداعى گاندبولدان قازاقستان چەمپيوناتى ءوتتى, دەپ حابارلايدى astana-akshamy.kz.
ەلوردانىڭ «اسپان» سپورت كلۋبىندا اتالعان سۋپەر ليگانىڭ 32-ءشى چەمپيوناتى ۇيىمداستىرىلدى. بۇعان دەيىن ءوزارا سايىسقا تۇسكەن 7 كوماندانىڭ ىشىنەن ەڭ مىقتى 4 كوماندا ىرىكتەلىپ شىعىپ, فينالدا كۇش سىناستى. ال ويىنعا ۇلتتىق ساناتتاعى سپورت تورەشىلەرى قازىلىق ەتتى.
«ايەلدەر كومانداسىنا 16-دان 49-عا دەيىنگى سپورتشىلار قاتىسا الادى. بيىلعى جارىستىڭ ەرەكشەلىگى وسى سپورت تۇرىنە جاستار كوبىرەك قوسىلىپ جاتىر. الدىڭعى چەمپيوناتتاردا كوبىنە 20-دان اسقان قىزدار بولاتىن. ءبىز استانالىق سپورت مەكتەپتەرىندەگى سەكتسيالارداعى جوعارى ليگاداعى قىزداردى ىرىكتەپ, سۋپەر ليگاعا ەرتە جاستان باستاپ الىپ جاتىرمىز. جالپى, گاندبولعا قىزدار 9 جاسىنان باستاپ قاتىسا بەرەدى», – دەيدى «گاندبول» استانا كلۋبىنىڭ ديرەكتورى ميرا قالاباي.
سونداي-اق, ونىڭ ايتۋىنشا, استانالىق گاندبولشىلار اراسىندا وزگە قالادان كەلگەن لەگيونەرلەر جوق, تەك قانا قالالىق سپورت مەكتەپتەرىنەن ءوسىپ شىققان سپورتشى قىزداردان قۇرالعان.
ال فينالدا قىزىلوردا, استانا, وسكەمەن, شىمكەنت كوماندالارى ءوزارا جۇلدەلى ورىندارعا تالاستى.
ناتيجەسىندە قىزىلوردالىق گاندبولشىلار 1-ورىندى, استانالىق سپورتشىلار 2-ورىندى جەڭىپ الدى. وسكەمەن كومانداسى 3-ورىندى, شىمكەنت كومانداسى 4-ورىندى يەلەندى. سونىمەن قاتار, ولاردىڭ اراسىنداعى مىقتى ويىنشىلار دا انىقتالدى.
ايتا كەتەيىك, گاندبول – وليمپيادالىق ويىن ءتۇرى. سپورت كلۋبى وليمپيادا ويىندارىنا قاتىسۋ ءۇشىن 2028 جىلعى لەتسەنزيانى الۋعا كۇش سالىپ جاتىر.
