استانادا «بايقوڭىر» اۋدانىنىڭ «اتاتۇرىك» ساياباعىندا «ۇلتتىق ويىن – ۇلت قازىناسى» اتتى تارتىستى سايىس ءوتتى, دەپ حابارلايدى astana-akshamy.kz.
كوڭىلدى دودا «اكەلەر كۇنى» مەرەكەسى اياسىندا «بايقوڭىر» اۋدانىنىڭ اكەلەرى مەن بالالارىنىڭ قاتىسۋمەن ۇيىمداستىرىلدى. ءىس-شارانىڭ باستى ماقساتى, قازاقتىڭ ۇلتتىق ويىندارىن ويناي وتىرىپ, وتباسى ينستيتۋتىن نىعايتۋ. سونداي-اق, جانۇياداعى اكە ءرولىنىڭ ماڭىزدىلىعىن كورسەتۋ, وتباسى قۇندىلىقتارىن دارىپتەۋ, اكە مەن بالا اراسىنداعى قارىم-قاتىناستى نىعايتۋ.
وتباسىلىق جارىسقا ەلوردالىق اكەلەر مەن بالالار قاتىسىپ, قازاقتىڭ «ارقان تارتۋ», «بەس تاس», «اسىق اتۋ», «توعىزقۇمالاق», «لاڭگى تەبۋ» سىندى ۇلتتىق ويىندارىنان ءوزارا باق سىنادى.
ناتيجەسىندە, كوپتىڭ ىشىنەن وزا شاۋىپ, باستى جۇلدەنى ايدار شوناەۆ پەن بالاسى تاڭاتقان نۇريسلام جەڭىپ الدى. جارىس سوڭىندا جەڭىمپازداردى اڭگىمەگە تارتقان ەدىك:«مەن بايقوڭىر اۋدانىنداعى №4 مەكتەپ گيمنازياسىنان كەلدىم. ءوزىم اتالعان مەكتەپتە دەنە شىنىقتىرۋ ءپانىنىڭ مۇعالىمىمىن. ال ۇلىم تاڭاتقان نۇريسلام وسى ءبىلىم ورداسىنىڭ وقۋشىسى. بۇگىن ەكەۋمىز مەكتەبىمىمىزدىڭ نامىسىن ءساتتى قورعاپ شىقتىق. باسقا قاتىسۋشىلار دا وڭاي شاعىلار جاڭعاق بولعان جوق. ولار بىزگە مىقتى قارسىلاس بولدى. جارىس وتە تارتىستى ءوتتى دەپ ايتا الامىن. وسىنداي ۇلتتىق سپورتتى دامىتۋعا, ناسيحاتتاۋعا باعىتتالعان سايىستاردىڭ كوبىرەك ۇيىمداستىرىلعانىن قولدايمىن».
ايتا كەتەيىك, بيىل ايتۋلى مەرەكە ماۋسىم ايىنىڭ ون التىنشى جۇلدىزىنا تۇسپا-تۇس كەلدى.
