ەرتەڭ استانادا «Dauletten» قايىرىمدىلىق قورى «ءبىلىمنىڭ جۇلدىزى» I رەسپۋبليكالىق فورۋمىن ۇيىمداستىرادى. فورۋمعا ەلىمىزدىڭ ءار وڭىرىنەن جۇزدەن جۇيرىك شىققان «ءبىلىمنىڭ جۇلدىزى» شاكىرتاقىسىنىڭ جەڭىمپازدارى جينالادى. جەڭىمپازداردى ماراپاتتاۋ راسىمىنە قر پارلامەنتى ءماجىلىسىنىڭ دەپۋتاتتارى مەن مينيسترلەر, قوعام بەلسەندىلەرى قاتىسادى, دەپ حابارلايدى astana-akshamy.kz
«ءبىلىمنىڭ جۇلدىزى» شاكىرتاقىسى – «Dauletten» قايىرىمدىلىق قورىنىڭ باستاماسىمەن بيىل ءۇشىنشى مارتە تاعايىندالماق. شاكىرتاقى تاعايىنداۋ ماقساتى – ەلىمىزدەگى كوللەدج جانە جوعارى وقۋ ورىندارىندا وقيتىن ۇزدىك ستۋدەنتتەردى الەۋمەتتىك جاعدايىنا بايلانىستى قارجىلاي قولداۋ, ولاردىڭ زاماناۋي قوعامدىق تالاپتارعا ساي داعدىلارىن دامىتۋ. شاكىرتاقى وقۋدا, عىلىمدا جانە قوعامدىق ومىردە بەلسەندى, تالانتتى ۇزدىك ستۋدەنتتەردى ىنتالاندىرۋ ءۇشىن بەرىلەدى.
بيىل قازاقستاننىڭ تۇكپىر-تۇكپىرىنەن جينالعان 200 ستۋدەنت 100 000 تەڭگە كولەمىندەگى ءبىر رەتتىك اقشالاي سىياقىعا يە بولماق. ىرىكتەۋگە ءار وڭىردەن 987 ءوتىنىم كەلىپ ءتۇستى. شاكىرتاقى يەگەرلەرىنىڭ 188-ءى جوو ستۋدەنتتەرى بولسا, قالعان 12 جەڭىمپاز كوللەدج ستۋدەنتى. شاكىرتاقىنى تاعايىنداۋ جىل سايىن قور قامقورشىلىق كەڭەسىنىڭ شەشىمىمەن جۇزەگە اسىرىلادى. جەڭىمپازدار اشىق بايقاۋ نەگىزىندە بىرنەشە كەزەڭدەر ارقىلى ىرىكتەلدى. بايقاۋ جىلىنا ءبىر رەت, وقۋ جىلىنىڭ اياعىندا وتكىزىلەدى.
