بۇگىن استانادا ارداگەرلەر ۇيىمىنىڭ پلەنۋمى ءوتتى, دەپ حابارلايدى astana-akshamy.kz.
«ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسىنىڭ پلەنۋمى وتىرىسىنا مادەنيەت جانە اقپارات ءمينيسترى ايدا بالاەۆا, ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا, ءماجىلىس دەپۋتاتتارى, قوعام قايراتكەرلەرى جانە ۇەۇ وكىلدەرى قاتىستى.
ءىس-شارا بارىسىندا ارداگەرلەر ۇيىمى مەملەكەت باسشىسىنىڭ «ادال ادام – ادال ەڭبەك – ادال تابىس» قاعيداتىن جۇزەگە اسىرۋدىڭ ماڭىزىن تالقىلادى.
ايدا بالاەۆا پلەنۋمدا ارداگەرلەردىڭ, ياعني اعا بۋىننىڭ ۇلتتىق بىرەگەيلىكتى نىعايتۋ مەن ەلدىڭ قارقىندى دامۋىنداعى ءرولىن اتاپ ءوتتى. كەلەر جىلى ەكىنشى دۇنيەجۇزىلىك سوعىستىڭ 80 جىلدىعىنا وراي, مينيسترلىك ءىس-شارالار جوسپارىن ازىرلەدى.
«بيىل ەكىنشى دۇنيەجۇزىلىك سوعىسقا قاتىسقان قازاقستان ارداگەرلەرى تۋرالى مالىمەتتەردى قامتيتىن بارشاعا قولجەتىمدى «باتىرلارعا تاعزىم» پورتالى ىسكە قوسىلدى. بۇگىندە پورتالدىڭ قىزمەت اياسى كەڭەيىپ, بارلىق قازاقستاندىق ارداگەرلەر تۋرالى دەرەكتەردى بىرىكتىرەتىن اقپاراتتىق ينتەراكتيۆتى جۇيە رەتىندە جۇمىس ىستەۋىن ماقسات ەتىپ وتىرمىز. سونداي-اق سوعىسقا قاتىسۋشىلارعا ارنالعان قازاقستان-رەسەي تاراپىنىڭ بىرلەسكەن فوتو-البومىن شىعارۋ جۇمىستارى جۇرگىزىلۋدە», – دەدى مادەنيەت جانە اقپارات ءمينيسترى ايدا بالاەۆا.
جيىن سوڭىندا ايدا بالاەۆا كوشە اتاۋلارىن بەرۋ, ەسكەرتكىشتەر ورناتۋ جانە تاعى دا باسقا وزەكتى ماسەلەلەردە ارداگەرلەر ۇيىمىمەن تىعىز بايلانىستا بولىپ, بىرگە جۇمىس ىستەۋگە سەنىم ءبىلدىردى.
