26 ماۋسىم حالىقارالىق ەسىرتكى زاتتارىن تەرىس پايدالانۋمەن جانە ولاردىڭ زاڭسىز اينالىمىمەن كۇرەس كۇنى اتالىپ وتەدى. وسى كۇنگە وراي استانادا «استانا – ەسىرتكىسىز قالا!» ەسىرتكىگە قارسى اۋقىمدى اكتسياسى وتەدى, دەپ حابارلايدى astana-akshamy.kz.
«استانا – ەسىرتكىسىز قالا!» اكتسياسى 22 ماۋسىمدا «حان شاتىر» سوو-دا ساعات 13:00-دەن 16:00-گە دەيىن, سونداي-اق ەسىل جاعالاۋىنداعى امفيتەاتردا ساعات 17:00-دەن 20:00-گە دەيىن وتەدى. وعان قازاقستاندىق ەسترادا مەن سپورت جۇلدىزدارى, سپورتتىق, ۆوكالدىق جانە بي ۇجىمدارى قاتىسادى.
ءىس-شارانىڭ ۇيىمداستىرۋشىلارى استانا پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسى بولىپ سانالادى.
اكتسياعا قاتىسۋشىلارعا كينولوگيالىق ورتالىقتىڭ قىزمەتتىك-ىزدەستىرۋ يتتەرىمەن كينولوگتاردىڭ جۇمىسى كورسەتىلەدى.
سونداي-اق اكتسيانىڭ بارلىق بەلسەندى قاتىسۋشىلارى ءۇشىن ۆيكتورينالار, سپورتتىق جارىستار, سىيلىقتار ۇيىمداستىرىلادى.
ءىس-شارا شەڭبەرىندە ەلوردا اۋماعىندا ناشاقورلىققا قارسى ءىس-قيمىلعا قوسقان ۇلەسى ءۇشىن ۇەۇ وكىلدەرى مەن ەرىكتىلەر مەدالدارمەن, گراموتالارمەن جانە العىس حاتتارمەن ماراپاتتالادى.
ءىس-شارا ەلوردا اكىمدىگىنىڭ, پسيحيكالىق دەنساۋلىق ورتالىعىنىڭ, ايۆ-ينفەكتسيالارىنىڭ الدىن الۋ ورتالىعىنىڭ, «رەنەسسانس» وڭالتۋ ورتالىعىنىڭ جانە باسقا دا ۇكىمەتتىك ەمەس ۇيىمداردىڭ بەلسەندى قاتىسۋىمەن وتكىزىلەدى.
