استانادا حالىقارالىق وليمپيادا كۇنى اتاپ ءوتىلدى

23 ماۋسىم كۇنى الەمدە حالىقارالىق وليمپيادا كۇنى اتاپ وتىلەدى. قازاقستان اتالعان اۋقىمدى شاراعا 31-رەت قاتىسىپ وتىر, دەپ حابارلايدى astana-akshamy.kz

ەرەكشە داتانى تويلاۋ بارىسىندا قازاقستان ۇلتتىق وليمپيادالىق كوميتەتى مەرەكە مەن وليمپيادالىق قوزعالىستىڭ ماڭىزىن ارتتىراتىن بىرقاتار ءىس-شارا وتكىزدى.

مەرەكەلىك باعدارلامانىڭ نەگىزگى بولىگى استانادا ءوتتى. ەلوردا تۇرعىندارى بىرنەشە كۇن بويى ءتۇرلى سپورتتىق ءىس-شارالارعا قاتىسىپ, عالامدىق دەڭگەيدە تويلاناتىن حالىقارالىق وليمپيادا كۇنىنىڭ ءبىر بولشەگى اتاندى. بۇل ءىس-شارالارعا جالپى ەسەبى مىڭنان اسا ادام قاتىسقان.

نەگىزگى ءىس-شارالار وتكەن ترياتلون ساياباعىنا كەلۋشىلەر ۇلكەن مەرەكەنىڭ ءبىر بولشەگىنە اينالدى. سپورتتىق باعدارلاما اياسىندا ترياتلون مەن 3ح3 باسكەتبولدان جارىستار ۇيىمداستىرىلدى.

ترياتلون دوداسىنا 250 ادام قاتىستى. كەيىن باسكەتبولشىلار ەستەلىك سىيلىقتار ءۇشىن ءوزارا سىنعا ءتۇستى. ودان بولەك, كوركەم گيمناستيكا, برەيكينگ, تاەكۆوندو جانە بوكستان قوناقتارعا ارنايى كورسەتىلىم نومىرلەرى ۇسىنىلدى.

مەرەكەلىك باعدارلامانى برەيكينگتەن قازاقستان ۇلتتىق كومانداسىنىڭ مۇشەلەرى اشىپ, ساحنادا ءوز شەبەرلىكتەرىن كورسەتتى.

تاەكۆوندو جانە بوكستان كورسەتىلىم نومىرلەرىن №3 مامانداندىرىلعان بالالار مەن جاسوسپىرىمدەردىڭ وليمپيادالىق رەزەرۆ مەكتەبىنىڭ سپورتشىلارى ورىندادى. ال كوركەم گيمناستيكانىڭ سۇلۋلىعىن №1 بالالار مەن جاسوسپىرىمدەردىڭ وليمپيادالىق رەزەرۆ مەكتەبىنىڭ گيمناستارى كوپشىلىك الدىندا پاش ەتتى.

«حالىقارالىق وليمپيادا كۇنى ۇزاق جىلدار بويى الەم حالقىن ورتاق ەموتسياعا بولەپ, جەڭىسكە دەگەن ۇمتىلىسپەن بىرىكتىرىپ كەلەدى. ءبىز ۇوك-تە بارلىق چەمپيوننىڭ بالالىق شاقتان كەلەتىنىن ءجيى ايتامىز, سوندىقتان, بۇل سپورتتىق مەرەكەنى مىندەتتى تۇردە بالالاردىڭ – بولاشاق چەمپيونداردىڭ اراسىندا وتكىزەمىز. قازاقستاندا سپورتقا قاتىستى بالا ارماندارى ورىندالعان كەيىپكەرلەر مەن قاھارماندار وتە كوپ. وسى مەرەكەنى بىزبەن بىرگە اتاپ وتكەن بارشاڭىزعا العىس ايتامىن. ۇلتتىق وليمپيادالىق كوميتەتتىڭ جانە ءبىزدىڭ ۇوك پرەزيدەنتى گەننادي گولوۆكيننىڭ اتىنان بارشاڭىزدى وليمپيادا كۇنىمەن قۇتتىقتايمىن!» – دەدى قازاقستان ۇوك باس حاتشىسى جانار وتەشەۆا.

سپورتتىق جارىستارعا قاتىسۋشىلاردىڭ بارلىعى جارىس ناتيجەسىنىڭ قانداي بولعانىنا قاراماستان, حوك پرەزيدەنتى توماس باح پەن قازاقستان ۇوك پرەزيدەنتى گەننادي گولوۆكيننىڭ قولى قويىلعان Olympic Day قاتىسۋشىسى سەرتيفيكاتىن يەلەنىپ, ەستەلىكتەر سىيلىقتارمەن ماراپاتتالدى.