استانا اكىمى جەڭىس قاسىمبەك Instagram پاراقشاسىندا قالادا ينۆاتاكسي سانىنىڭ 30 بىرلىككە ارتقانى تۋرالى مالىمدەدى, دەپ حابارلايدى astana-akshamy.kz
«بيىل ينۆاتاكسي سانى 30 بىرلىككە جۋىق ارتتى. ماسەلەن, بىلتىر 117 كولىك بولسا, قازىر 145 كولىك بار.
ينۆاتاكسيدەگى ماڭىزدى ماسەلە – مۇگەدەكتىگى بار جانداردى كرەسلو-اربامەن تاسىمالداۋعا ارنالعان مامانداندىرىلعان ماشينالار سانىن ارتتىرۋ. مۇنداي ارنايى ماشينالاردىڭ سانى 26-عا دەيىن ءوستى. بۇگىن كولىك ءمينيسترى مارات قاراباەۆپەن وسىنداي ارنايى ماشينالاردىڭ ارتىقشىلىقتارىمەن تانىستىم.
جالپى, سوڭعى ەكى جىلدا ينۆاتاكسي سانى 2 ەسەگە جۋىق ارتتى. ينۆاتاكسي مۇگەدەكتىگى بار جاندارعا تەڭ مۇمكىندىكتەر بەرەدى, ولاردىڭ الەۋمەتتىك ينتەگراتسياسىنا جانە ءومىر ءسۇرۋ ساپاسىنا, قوزعالۋ ەركىندىگىن جاقسارتۋعا اسەر ەتەدى. جاڭا تەحنيكا كورسەتىلەتىن قىزمەتتەردىڭ جىلدامدىعىن, ۇيلەسىمدىلىگىن جانە تيىمدىلىگىن ارتتىرادى.
سول سياقتى وڭالتۋ ورتالىقتارىنىڭ جەلىسىن, قالالىق ورتانىڭ قولجەتىمدىلىگىن, پروتەزدىك-ورتوپەديالىق كومەكتى, ساناتوري-كۋرورتتىق ەمدەۋدى جانە ت.ب. كەڭەيتۋ بويىنشا جۇمىس ىستەيمىز», – دەپ جازدى ەلوردا اكىمى.
