مقىا توراعاسى كورەيا رەسپۋبليكاسىنىڭ پەرسونالدى باسقارۋ
ءمينيسترى كيم سىن حومەن كەزدەستى, دەپ حابارلايدى astana-akshamy.kz
بۇگىن قر مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي كورەيا رەسپۋبليكاسىنىڭ پەرسونالدى باسقارۋ ءمينيسترى كيم سىن حومەن كەزدەستى. ەكىجاقتى كەزدەسۋ بارىسىندا تاراپتار مەملەكەتتىك قىزمەتتەگى پەرسونالدى باسقارۋ بويىنشا قول قويىلعان ءوزارا تۇسىنىستىك جانە ىنتىماقتاستىق تۋرالى مەموراندۋمداعى شارالاردى ىسكە اسىرۋ بارىسىن تالقىلادى.
دارحان جازىقباي مەملەكەت باسشىسىنىڭ مەملەكەتتىك قىزمەتتى تۇبەگەيلى جاڭعىرتۋ بويىنشا العا قويعان مىندەتتەرىنە سايكەس اگەنتتىكپەن اتقارىلىپ جاتقان شارالار جانە وسى باعىتتا تسيفرلىق تەحنولوگيالاردى قولدانۋ جۇمىسىمەن تانىستىردى.
اگەنتتىك توراعاسى مەملەكەتتىك قىزمەتتە ادام رەسۋرستارىن جەتىلدىرۋ, HR قۇرالداردى ەنگىزۋ, «e-Qyzmet» جۇيەسى نەگىزىندە ىرىكتەۋ جانە پەرسونالدى باسقارۋدى تسيفرلاندىرۋ بويىنشا جوبالار مەن باستامالارعا دا توقتالدى.
كيم سىن حو مەملەكەتتىك قىزمەت سالاسىن زامان تالابىنا ساي ۇنەمى جەتىلدىرىپ وتىرۋ ماڭىزدىلىعىنا توقتالىپ, ءوز ەلىنىڭ مەملەكەتتىك قىزمەت سالاسىنداعى تاجىريبەسىمەن ءبولىستى.
سونداي-اق تاراپتار مەملەكەتتىك قىزمەتشىلەردىڭ ادام رەسۋرستارىن باسقارۋ سالاسىنداعى بىلىكتىلىگىن ارتتىرۋ ماقساتىندا ولار ءۇشىن قىسقا مەرزىمدى تاعىلىمدامالار مەن ۇزاق مەرزىمدى وقىتۋدى ۇيىمداستىرۋ مۇمكىندىگىن تالقىلادى.
مقىا توراعاسى كورەيا رەسپۋبليكاسىنىڭ مەملەكەتتىك قىزمەتتەگى ادامي رەسۋرستاردى باسقارۋداعى جاساندى ينتەللەكت تەحنولوگيالارىن قولدانۋ جانە اۆتوماتتاندىرۋ, سونداي-اق مەملەكەتتىك كورسەتىلەتىن قىزمەتتەردىڭ ساپاسىن باعالاۋ تاجىريبەسىنە قىزىعۋشىلىق ءبىلدىردى.
كەزدەسۋ سوڭىندا تاراپتار الدا مەملەكەتتىك قىزمەت سالاسىنداعى تاجىريبە جانە ءبىلىم الماسۋدا ىنتىماقتاستىقتى ودان ءارى دامىتۋعا دايىن ەكەندىكتەرىن ءبىلدىردى.
