قالالىق ءماسليحات دەپۋتاتتارى مەن «جاسىل ەل» جاستارى تازالىق اكتسياسىن وتكىزدى

«تازا قازاقستان. استانا – تازالىق پەن ءتارتىپتىڭ ۇلگىسى» ەكولوگيالىق اكتسياسى اياسىندا قالالىق ءماسليحات دەپۋتاتتارى مەن «جاسىل ەل» جاستار ەڭبەك جاساقتارى پرەزيدەنت ساياباعىندا تازالىق جۇمىسىن جۇرگىزدى, دەپ حابارلادى astana-akshamy.kz.

استانا قالاسىنىڭ جاستار ساياساتى ماسەلەلەرى باسقارماسى باستاماسىمەن وتكەن ەكوجيىنعا «جاسىل ەل» جاۋىنگەرلەرى قاتىستى. ولار ءماسليحات دەپۋتاتتارىمەن بىرگە جاسىل جەلەكتەردى سۋاردى.

«بۇگىنگى ءىس-شارا «تازا قازاقستان: استانا – تازالىق پەن ءتارتىپتىڭ ۇلگىسى» ەكولوگيالىق اكتسياسى اياسىندا ءوتىپ جاتىر. ەكواكتسيانى قالالىق ءماسليحات دەپۋتاتتارى مەن «جاسىل ەل» حح ماۋسىمىنىڭ جاۋىنگەرى قولداپ وتىر. جالپى بۇل ءار ماۋسىم سايىن اتقارىلىپ كەلە جاتقان جۇمىس دەپ ايتۋعا بولادى. «جاسىل ەل» جوباسى اياسىندا ەلوردادا بيىل 14-35 جاس ارالىعىنداعى 4200-دەن استام جاس جۇمىسپەن قامتىلىپ وتىر», – دەيدى جاستار ساياساتى ماسەلەلەرى باسقارماسىنىڭ باسشىسى سامات يبراەۆ.

ەلوردالىق 8-سىنىپ وقۋشىسى داريا سىزدىقوۆانىڭ سوزىنشە, جوبا جازعى دەمالىستى پايدالى وتكىزۋگە مۇمكىندىك بەرەدى.

«مەن №68 مەكتەپ گيمنازياسىندا وقيمىن. «جاسىل ەل» جوباسىنا العاش رەت قاتىسىپ تۇرمىن. ءبىز كۇنىنە 4 ساعات اباتتاندىرۋ جانە تازالىق جۇمىسىن جۇرگىزەمىز. جازعى دەمالىستى ءتيىمدى وتكىزىپ جاتىرمىز دەپ ويلايمىن. كەلەسى جىلى دا ەڭبەك جاساعى قاتارىندا بولۋ ويدا بار», – دەيدى ەلوردالىق وقۋشى.

ايتا كەتەيىك, ەلوردادا «جاسىل ەل» جوباسى تامىز ايىنىڭ سوڭىنا دەيىن جالعاسادى.