قۇربان ايت مەيرامىنا وراي استانادا ءداستۇر بويىنشا كومەككە مۇقتاج جاندارعا ازىق-تۇلىك سەبەتتەرى تاپسىرىلىپ جاتىر, دەپ حابارلايدى astana-akshamy.kz.
بۇل اۋقىمدى ءىس-شارانى قالا اكىمدىگى مەن دەمەۋشى بولعان Qazaq Oil كومپانياسى «يگى ىستەر مارافونى» اياسىندا وتكىزىپ جاتىر.
«بۇگىن مىڭعا جۋىق سەبەت الەۋمەتتىك جاعىنان وسال وتباسىلارعا تاراتىلىپ جاتىر. ولار – كوپبالالى وتباسىلار, جالعىزباستى انالار, زەينەتكەرلەر, مۇگەدەكتىگى بار ازاماتتار, ەرەكشە بالا تاربيەلەپ وتىرعان وتباسىلار. قوراپتىڭ سالماعى – 45 كەلى. ازىق-تۇلىك سەبەتىندە كۇندەلىكتى تۇرمىسقا قاجەتتى تاۋارلار بار. اتاپ ايتساق, كۇنباعىس مايى, قانت, ۇن, ءسۇت جانە ت.ب. وسىنداي قايىرىمدىلىق ءىس-شاراسىنا اتسالىسقانى ءۇشىن «Qazaq Oil» كومپانيسىنا العىسىمىزدى بىلدىرەمىز. سونىمەن قوسا, وزگە دە بيزنەس وكىلدەرىن يگى ىسكە قاتىسۋعا شاقىرامىز», – دەدى استانا قالاسى اكىمىنىڭ كەڭەسشىسى قۋانىش مولدابەك.
ال «استانا جاستارى» جاستار رەسۋرستىق ورتالىعىنىڭ ەرىكتىلەرى ازىق-تۇلىك سەبەتتەرىن مۇقتاج جانداردىڭ ۇيلەرىنە دەيىن جەتكىزىپ بەرەدى.
سەبەتتەردىڭ ءبىرى استانالىق كوپبالالى انا جاناگۇل قاراساەۆاعا تابىستالدى. ول وسىنداي كومەك كورسەتكەنى ءۇشىن ۇيىمداستىرۋشىلارعا شەكسىز العىسىن ءبىلدىردى.
«العىسىمدى بىلدىرگىم كەلەدى. مەرەكەلىك كوڭىل-كۇي سىيلاعاندارىڭىزعا راقمەت. بارشا قازاقستاندىقتاردى قۇربان ايت مەرەكەسىمەن قۇتتىقتايمىن! دەندەرىڭىزگە ساۋلىق, باستارىڭىزعا اماندىق تىلەيمىن!» – دەدى كوپبالالى انا.
مۇنداي اكتسيا استانادا جىل سوڭىنا دەيىن ۇيىمداستىرىلادى.
