تۋريزم جانە سپورت ءمينيسترى ەرمەك مارجىقپاەۆ استاناداعى القا ماجىلىسىندە ەلوردادا وتەتىن V دۇنيەجۇزىلىك كوشپەندىلەر ويىندارىن ۇيىمداستىرۋ جانە وتكىزۋگە دايىندىق بارىسى تۋرالى ايتتى, دەپ حابارلايدى astana-akshamy.kz.
ول الدىمەن اتالعان دودادا سپورتشىلارىمىزدىڭ ءساتتى ونەر كورسەتۋىنە بار جاعدايدى جاساۋ كەرەك ەكەنىن تىلگە تيەك ەتتى.
«وسى جىلدىڭ ماڭىزدى وقيعالارىنىڭ ءبىرى – ەلوردادا V دۇنيەجۇزىلىك كوشپەندىلەر ويىندارىن ۇيىمداستىرۋ جانە وتكىزۋ. بايراقتى باسەكەنىڭ سالاماتتى ءومىر سالتىن دارىپتەۋدەگى, باۋىرلاستىق بايلانىستاردى ارتتىرۋداعى ماڭىزىن مەملەكەت باسشىسى قاسىم-جومارت كەمەلۇلى مالىمدەگەن بولاتىن. «سپورت – بەيبىتشىلىك ەلشىسى» دەگەن ءسوز بار. سپورت ارقىلى ورتاق قۇندىلىقتاردى قالىپتاستىرۋ, حالىقتاردى جاقىنداستىرۋ ۇستانىمىن كوزدەگەن ءجون. بۇل رەتتە, كوشپەندىلەر ويىندارىنا الەمنىڭ 100-دەن استام ەلىنەن دەلەگاتسيالار كەلەدى دەپ كۇتىلۋدە. بۇل دودادا سپورتتىق ويىندارمەن بىرگە مادەني جانە عىلىمي باعدارلاما دا كەڭىنەن ۇسىنىلادى. ات جالىندا ازامات بولىپ ەر جەتكەن قازاق حالقى ەجەلدەن سپورتقا بەيىم. ءوز جەرىمىزدە وتەتىن جارىسقا تىڭعىلىقتى دايىندالىپ, قازاقستان قۇراماسى ءساتتى ونەر كورسەتۋى ءۇشىن سپورتشىلارعا بارىنشا جاقسى جاعداي جاساۋىمىز كەرەك. وڭىرلەر دەنە شىنىقتىرۋ جانە سپورت باسقارمالارى باسشىلارىن ۇلتتىق سپورت تۇرلەرىن دامىتۋ بويىنشا جۇمىسىن جانداندىرۋدى سۇرايمىن», – دەدى ەرمەك مارجىقپاەۆ.
ايتا كەتسەك, ەلورداداعى القا ماجىلىسىندە مينيستر بۇقارالىق جانە وليمپيادالىق سپورت تۇرلەرىن جەتىلدىرۋدە اۋقىمدى جۇمىستار كۇتىپ تۇرعانىن ايتقان بولاتىن. سونداي-اق مينيستر سپورتشىلاردى دايارلاۋدىڭ زاماناۋي ينفراقۇرىلىمىن قۇرۋدىڭ ماڭىزدىلىعىن اتاپ وتكەن ەدى.
ەسكە سالا كەتسەك, V دۇنيەجۇزىلىك كوشپەندىلەر ويىنى بيىل 8-14 قىركۇيەك ارالىعىندا استانا قالاسىندا وتەدى.
فوتو: ادىلەت بىرىمقۇلوۆ / Kazinform
