استانادا قاردىڭ قالىڭ تۇسۋىنە بايلانىستى قالانىڭ كوممۋنالدىق قىزمەتى تاۋلىك بويى كۇشەيتىلگەن رەجيمدە جۇمىس ىستەۋدە. 7 اقپان كۇنى تۇستەن كەيىن قار پوليگوندارىنا 51 مىڭ تەكشە مەتردەن استام قار شىعارىلدى, دەپ حابارلايدى Astana-akshamy.kz ەلوردا اكىمدىگىنىڭ رەسمي سايتىنا سىلتەمە جاساپ.
8 اقپانعا قاراعان ءتۇنى قالا بويىنشا 300-دەن استام جول جۇمىسشىسى مەن 1,4 مىڭنان استام ارنايى تەحنيكا جۇمىس ىستەيدى.
كۇندىز قالادان 3,6 مىڭ اۋىر جۇك كولەمىنە تەڭ 51 مىڭ تەكشە مەتردەن استام قار شىعارىلدى.
قىس مەزگىلىنىڭ باسىنان باستاپ قار پوليگوندارىنا 292 مىڭ رەيسپەن 3,9 ملن تەكشە مەتردەن استام قار جەتكىزىلدى.
«قازگيدرومەت» رمك دەرەكتەرى بويىنشا تاڭەرتەڭ جانە تۇستەن كەيىن 7, 8, 9 اقپان كۇندەرى استانادا قارلى بوران, كوكتايعاق بولۋى مۇمكىن. وڭتۇستىك-باتىسقا اۋىساتىن وڭتۇستىك-شىعىستان سوعاتىن جەل ەكپىنى 15-20 م/س, كەيدە 23-28 م/س بولۋى ىقتيمال.
كۇشتى داۋىلدىڭ بولاتىنى تۋرالى جاريالانعان ەسكەرتۋگە بايلانىستى استانا قالاسىنىڭ توتەنشە جاعدايلار دەپارتامەنتى ەلوردا تۇرعىندارى مەن قوناقتارىن مامانداردىڭ ۇسىنىمدارىن تىڭداۋعا, ساق بولۋعا, اۋا رايىنىڭ وزگەرۋى جانە ەنگىزىلگەن شەكتەۋلەر تۋرالى اقپاراتتى قاداعالاۋعا شاقىرادى.
