قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى نازيرا نۇرباەۆا تايلاند كورولدىگى سىرتقى ىستەر ءمينيسترىنىڭ ورىنباسارى دجاككاپونگ سانگماني باستاعان تاي دەلەگاتسياسىمەن كەزدەسۋ وتكىزدى, دەپ حابارلايدى astana-akshamy.kz.
تاي دەلەگاتسياسىنىڭ قۇرامىنا تاماق ونەركاسىبى, دەنساۋلىق ساقتاۋ, ءبىلىم بەرۋ جانە كونسالتينگ سياقتى سالالاردى قامتيتىن 10-نان استام كاسىپكەرلەر كىردى.
كەلىسسوزدەر بارىسىندا تاراپتار ەكى ەلدىڭ ساۋدا-ەكونوميكالىق ىنتىماقتاستىعىنىڭ اعىمداعى جاعدايى مەن ودان ءارى دامىتۋ كەلەشەگىن تالقىلادى. تاي دەلەگاتسياسىنىڭ مۇشەلەرىنە ەلىمىزدەگى ينۆەستيتسيالىق احۋال مەن ساۋدا ىنتىماقتاستىعىنىڭ پەرسپەكتيۆالارى تانىستىرىلدى.
تاراپتار 2022 جىلمەن سالىستىرعاندا (270,6 ملن اقش دولل.) 36% ءوسىپ, شامامەن 370 ملن اقش دوللارىن قۇراعان 2023 جىلعى ءوزارا تاۋار اينالىمىنىڭ رەكوردتىق كورسەتكىشىن اتاپ ءوتتى.
دەلەگاتسيا باسشىلارى ءوزارا ساۋدانى نىعايتۋعا مۇددەلىك تانىتىپ, اۋىل شارۋاشىلىعى, تۋريزم, مەديتسينا, ەنەرگەتيكا جانە تاماق ونەركاسىبى باعىتتارى بويىنشا ينۆەستيتسيالىق ىنتىماقتاستىقتىڭ ايتارلىقتاي الەۋەتى بار تۋرالى پىكىر ءبىلدىردى.
ءىس-شارا قورىتىندىسى بويىنشا «ساۋدا ساياساتىن دامىتۋ ورتالىعى» اكتسيونەرلىك قوعامى (QazTrade) مەن تايلاندتىڭ ساۋدا كەڭەسى اراسىندا ساۋدانى دامىتۋ جونىندەگى ىنتىماقتاستىق تۋرالى مەموراندۋمعا قول قويىلدى.
