استانا قالاسىنىڭ اكىمى جەڭىس قاسىمبەك Instagram پاراقشاسىندا وقۋشىلار مەن مۇعالىمدەردى وقۋ جىلىنىڭ اياقتالۋىمەن قۇتتىقتاپ, قالاداعى سالىنىپ جاتقان جاڭا مەكتەپتەر تۋرالى ايتتى, دەپ حابارلايدى astana-akshamy.kz
«مەكتەپتەردە سىنىپ ساعاتتارى ءوتتى, بالالار دەمالىسقا شىقتى. وقۋشىلاردى, اتا-انالار مەن ۇستازداردى وقۋ جىلىنىڭ اياقتالۋىمەن قۇتتىقتايمىن! جىل سايىن ءبىرىنشى سىنىپقا 20 مىڭنان استام وقۋشى كەلەتىنىن ەسكەرسەك, جاڭا مەكتەپتەر سانى بىرنەشە ەسەگە ارتتى.
قازىر ءبىز 100 مىڭعا جۋىق وقۋشى ورنىنا ارنالعان 32 مەكتەپتىڭ قۇرىلىسىن جۇرگىزىپ جاتىرمىز. ونىڭ ىشىندە جىل سوڭىنا دەيىن مەكتەپتەردىڭ رەكوردتى سانىنىڭ قۇرىلىسىن اياقتاۋدى جوسپارلاپ وتىرمىز. بۇل – 64 مىڭعا جۋىق وقۋشىعا ارنالعان 23 مەكتەپ (2 اۋىسىمدى). ال «جايلى مەكتەپ» ۇلتتىق جوباسى اياسىندا – 15 مەكتەپ (ەسىل – 6, نۇرا – 4, الماتى – 3, سارىارقا – 2), تاعى 5 مەملەكەتتىك مەكتەپ (نۇرا – 2, بايقوڭىر – 2, الماتى – 1), 3 جەكەمەنشىك (ەسىل – 2, الماتى – 1).
جاڭا وقۋ جىلىنىڭ باسىندا 32 مىڭعا جۋىق وقۋشى ورنىنا (2 اۋىسىمدا) ارنالعان 12 مەكتەپتىڭ قۇرىلىسىن اياقتاۋدى جوسپارلاپ وتىرمىز. ولار – «جايلى مەكتەپ» ۇلتتىق جوباسى اياسىنداعى 8 مەكتەپ:
ەسىل اۋدانى – 1 اۋىسىمدى 7800 وقۋشىعا ارنالعان 3 مەكتەپ – ورىنبور كوشەسى جانە №37 «SOHO» تك, ماڭگىلىك ەل داڭعىلى جانە ە 497 كوشەسى, قابانباي باتىر جانە سىعاناق كوشەلەرى, «پوكولەنيە» تك;
نۇرا اۋدانى – 4000 وقۋشىعا ارنالعان 1 اۋىسىمدى 2 مەكتەپ – تولە بي كوشەسى مەن 57 ۋچاسكەسىنىڭ قيىلىسى («زەلەنىي كۆارتال» تۇك), ە127, ە368, ە418, ە535 كوشەسى (قورعالجىن تاس جولى اۋدانى)
سارىارقا اۋدانى – 4000 وقۋشى ورنىنا ارنالعان 1 اۋىسىمدى 2 مەكتەپ – س-189 كوشەسى «زەمليانيچنايا» ساياجاي الابى, كوكتال ەلدى مەكەنى;
الماتى اۋدانى – 600 وقۋشىعا ارنالعان 1 اۋىسىمدى 1 مەكتەپ (ا.بايتۇرسىنۇلى كوشەسى, №9).
بايقوڭىر جانە نۇرا اۋداندارىندا تاعى ءۇش مەملەكەتتىك مەكتەپ: بايقوڭىر اۋدانىندا №12 مەكتەپ جانە №27 مەكتەپ-ليتسەي اۋماعىندا قوسىمشا جاڭا عيمارات, سول سياقتى نۇرا اۋدانىنىڭ №17 مەكتەپ-گيمنازيا اۋماعىنداعى جاڭا قوسىمشا عيمارات. سونداي-اق, ەسىل اۋدانىندا ۇلى دالا داڭعىلىندا (ارناۋ تك) تاعى ءبىر جەكە مەكتەپ اشىلادى.
وسىلايشا, 23 جاڭا مەكتەپ ارقىلى التى مەكتەپتە ءۇش اۋىسىمدى وقۋ ماسەلەسىن, تاعى 9 مەكتەپتە شامادان تىس رەجيمى ماسەلەسىن شەشۋدى جوسپارلاپ وتىرمىز», – دەپ جازدى ەلوردا اكىمى.
