24-30 ماۋسىم ارالىعىندا ەلىمىزدە رەپرودۋكتيۆتى دەنساۋلىق اپتالىعى وتەدى, دەپ حابارلايدى astana-akshamy.kz
ونى استانادا قالاي وتكىزەتىنىن قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى اينۇر تولەۋوۆا قالالىق كوممۋنيكاتسيالار قىزمەتىندە وتكەن بريفينگتە ايتتى.
رەپرودۋكتيۆتى دەنساۋلىق اپتالىعى اياسىندا بارلىق العاشقى مەديتسينالىق-سانيتارلىق كومەك ۇيىمدارىندا, استانا جاستار ورتالىعىندا اشىق ەسىك كۇندەرى وتەدى. سونداي-اق, بىلىكتى ماماندار جاستاردىڭ رەپرودۋكتيۆتى دەنساۋلىعى, جىنىستىق جولمەن بەرىلەتىن ينفەكتسيالاردىڭ الدىن الۋ, وتباسىن جوسپارلاۋ, ادام پاپيللوماۆيرۋستارى, ەرتە جاستان جۇكتىلىكتىڭ الدىن الۋ بويىنشا جۇمىس جۇرگىزەتىن بولادى.
«ادام قۇقىقتارىنىڭ جالپىعا بىردەي دەكلاراتسياسى جاسوسپىرىمدەردىڭ قۇقىعى بار ەكەنىن كورسەتەدى: رەپرودۋكتيۆتى دەنساۋلىق تۋرالى حاباردار بولۋ; كونتراتسەپتسيانىڭ قاۋىپسىز جانە ءتيىمدى ادىستەرىنە قول جەتكىزۋ. وتباسىن جوسپارلاۋ رەپرودۋكتيۆتى دەنساۋلىقتى ساقتاۋدىڭ الدىن الۋ شارالارىنىڭ ءبىرى بولىپ تابىلادى. 2024 جىلعى 1 ماۋسىمعا ايەلدەر سانى – 806 397, ونىڭ ىشىندە قۇنارلى جاستاعى ايەلدەر – 428 053 جانە 501 مىڭنان استام بالا. 15-17 جاس ارالىعىنداعى جاسوسپىرىمدەر سانى 71 351, ونىڭ ىشىندە قىزدار 35 317», – دەدى سپيكەر ەلورداداعى جاعداي تۋرالى.
ول دەنساۋلىقتى ساقتاۋ جانە جاسوسپىرىمدەر مەن جاستارعا تەگىن بىلىكتى مەديتسينالىق, پسيحولوگيالىق, الەۋمەتتىك جانە زاڭگەرلىك كومەك كورسەتۋ ءۇشىن قولايلى جاعدايلاردى قامتاماسىز ەتۋ ءۇشىن استانادا دۇرىس رەپرودۋكتيۆتى مىنەز-قۇلىقتى ناسيحاتتاۋ جۇزەگە اسىرىلاتىن 24 جاستار دەنساۋلىق ورتالىعى جۇمىس ىستەيتىنىن اتاپ ءوتتى.
«حدو جۇمىسىنىڭ قورىتىندىسى بويىنشا 2024 جىلدىڭ 1 توقسانىندا ءوتىنىش بىلدىرگەندەردىڭ سانى 26 333 ادامدى قۇرادى, ونىڭ ىشىندە ايەل – 15 100 ء(وتىنىش بەرگەندەردىڭ جالپى سانىنىڭ 57%), ەر – 11 233 (43%). بۇگىنگى كۇنى بولاشاق انالاردىڭ دەنساۋلىق دەڭگەيىن باستاپقى مەديتسينالىق-سانيتاريالىق كومەك دەڭگەيىندە جاقسارتۋ ءۇشىن وتباسىن جوسپارلاۋ كابينەتتەرى جۇمىس ىستەيدى – ەرلەر مەن ايەلدەرگە ۇرپاقتى بولۋ دەنساۋلىعىن قورعاۋ, حالىقتىڭ وتباسىن جوسپارلاۋ, قاۋىپسىز انا بولۋ قىزمەتتەرى مەن ادىستەرىنە قولجەتىمدىلىگىن قامتاماسىز ەتۋ ماسەلەلەرى بويىنشا كەڭەس بەرۋ ءۇشىن, ولار ايەلدەردى قاۋىپسىز انا بولۋ ماسەلەلەرىنە وقىتۋدى جانە حاباردار ەتۋدى جۇزەگە اسىرادى», – دەدى اينۇر تولەۋوۆا.
استانادا جىل سايىن «ۇرپاقتى بولۋ دەنساۋلىعىن ساقتاۋ, وتباسىن جوسپارلاۋ جانە سانالى اتا-انا بولۋ» الەۋمەتتىك جوباسى ىسكە اسىرىلۋدا.
