«تازا قازاقستان. استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسياسى اياسىندا ەلوردادا «ءساتتى سارسەنبى» ءىس-شاراسى ءوتتى, دەپ حابارلايدى astana-akshamy.kz.
ەكواكتسيا «جەلەزنودوروجنىي» تۇرعىن الابىندا ورنالاسقان قار پوليگونىنىڭ اۋماعىندا ءوتتى. تازالاۋعا «جاسىل ەل» جاستار ەڭبەك جاساعىنىڭ 100 قاتىسۋشىسى جۇمىلدىرىلدى.
«اكتسياعا كوبىنە جاسوسپىرىمدەر قاتىساتىندىقتان, قار پوليگونىنىڭ اۋماعى ورىن رەتىندە تاڭدالدى. ول قاۋىپسىزدىگىمەن, ءجۇرىس بولىگىنىڭ جانە وزەندەر مەن كولدەر سياقتى ىقتيمال قاۋىپتى تابيعي نىسانداردىڭ بولماۋىمەن, سونداي-اق كىرمە جولداردىڭ بولۋىمەن ەرەكشەلەنەدى», – دەپ ءتۇسىندىردى الماتى اۋدانى اكىمىنىڭ ورىنباسارى نۇرمات ءابدىرايىموۆ.
«ءساتتى سارسەنبى» اكتسياسى قالانىڭ ەكولوگيالىق جاعدايىن جاقسارتۋ جانە تازالىقتى ساقتاۋ ماقساتىندا وتكىزىلەدى.
«ءبىز قوقىستى جيناپ, قالانى تازا ەتۋ ءۇشىن الماتى اۋدانىنا باردىق. مۇنداي ءىس-شارالار ءبىزدىڭ ورتاق ماسەلەلەرىمىزدى بىرگە شەشە وتىرىپ, حالىقتى بىرىكتىرۋگە كومەكتەسەدى», – دەدى «جاسىل ەل» جاۋىنگەرى قايرات ءۋاليحان.
ءىس-شارا الماتى اۋدانى اكىمدىگىنىڭ, استانا قالاسى جاستار ساياساتى ماسەلەلەرى باسقارماسىنىڭ, «جاسىل ەل» جاستار ەڭبەك جاساعىنىڭ قولداۋىمەن ۇيىمداستىرىلدى.
ۇيىمداستىرۋشىلار قالانى تازارتۋ بويىنشا اكتسيالار اپتا سايىن وتكىزىلەتىنىن اتاپ ءوتتى.
ايتا كەتەيىك, بيىل «جاسىل ەل» ەڭبەك جاساقتارىنىڭ حح ەڭبەك ماۋسىمى باستالدى. جوبا اياسىندا ەلوردا بويىنشا 14 پەن 35 جاس ارالىعىنداعى 4200-دەن استام جاستار جۇمىسپەن قامتىلاتىن بولادى. ولار قالانىڭ نىساندارىن, سونىڭ ىشىندە «جاسىل بەلدەۋ» اۋماعىندا, الەۋمەتتىك نىسانداردى, جالپى ءبىلىم بەرۋ مەكەمەلەرىنىڭ اۋماعىندا, قالالىق ساياباقتاردا, كوگالداندىرۋعا قاتىسادى.
