استانادا شىۇ-عا مۇشە مەملەكەتتەردىڭ ەنەرگەتيكا مينيسترلەرىنىڭ كەڭەسى باستالدى
بۇگىن استانادا شانحاي ىنتىماقتاستىق ۇيىمىنا (شىۇ) مۇشە مەملەكەتتەردىڭ ەنەرگەتيكا مينيسترلەرىنىڭ ءتورتىنشى كەڭەسى باستالدى. ءىس-شارا قازاقستان رەسپۋبليكاسىنىڭ توراعالىعىمەن وتۋدە, دەپ حابارلايدى astana-akshamy.kz.
كەڭەسكە قاتىسۋشىلار: – رەسەي فەدەراتسياسى ەنەرگەتيكا ءمينيسترىنىڭ ورىنباسارى سەرگەي موچالنيكوۆ, – بەلارۋس رەسپۋبليكاسىنىڭ ەنەرگەتيكا ءمينيسترى ۆيكتور كارانكەۆيچ, – يران يسلام رەسپۋبليكاسىنىڭ ەنەرگەتيكا ءمينيسترى مەحرابيان الي اقبار, – قىرعىز رەسپۋبليكاسى ەنەرگەتيكا ءمينيسترى تاالايبەك يبراەۆ, – قحر مەملەكەتتىك ەنەرگەتيكا باسقارما باسشىسىنىڭ ورىنباسارى ۆان تسزينسۋن, – تاجىكستان رەسپۋبليكاسىنىڭ ەنەرگەتيكا جانە سۋ رەسۋرستارى ءمينيسترى دجۋما دالەر شوفاكير, – وزبەكستان رەسپۋبليكاسىنىڭ ەنەرگەتيكا ءمينيسترى جۋرابەك ميرزاماحمۋدوۆ.
كەڭەستىڭ ماقساتى – شىۇ-عا مۇشە مەملەكەتتەر اراسىندا ەنەرگەتيكالىق ىنتىماقتاستىق ماسەلەلەرىن تالقىلاۋ. شىۇ-عا مۇشە مەملەكەتتەردىڭ ەنەرگەتيكا مينيسترلىكتەرىنىڭ باسشىلارى 2022 جىلعى 15-16 قىركۇيەكتە سامارقاند قالاسىندا وتكەن شىۇ-عا مۇشە مەملەكەتتەر باسشىلارى كەڭەسىنىڭ وتىرىسىندا قازاقستان رەسپۋبليكاسى پرەزيدەنتى قاسىم-جومارت توقاەۆتىڭ باستاماسىمەن ازىرلەۋگە ۇسىنىلعان «شانحاي ىنتىماقتاستىق ۇيىمىنا مۇشە مەملەكەتتەردىڭ ەنەرگەتيكالىق ىنتىماقتاستىعىن دامىتۋدىڭ 2030 جىلعا دەيىنگى ستراتەگياسىن» قاراستىرادى.
شانحاي ىنتىماقتاستىق ۇيىمى – قاتىسۋشى ەلدەر ءۇشىن ديالوگ پەن ىنتىماقتاستىق الاڭى بولىپ تابىلاتىن ايماقتىق ۇيىم. بۇگىنگى تاڭدا شىۇ الەمدىك ءجىو-ءنىڭ شامامەن ۇشتەن ءبىرىن, ەۋرازيا اۋماعىنىڭ 60%-ىن, الەم حالقىنىڭ 42%-ىن قۇرايدى. ەنەرگەتيكا سالاسى شىۇ-عا مۇشە مەملەكەتتەر اراسىنداعى ىنتىماقتاستىقتىڭ اسا ماڭىزدى باعىتى بولىپ تابىلادى. ويتكەنى ول ەكونوميكالىق سالاعا ايتارلىقتاي ۇلەس قوسادى. شىۇ الەمدەگى ەڭ ءىرى ەنەرگەتيكالىق رەسۋرستاردى وندىرۋشىلەر مەن تاسىمالداۋشىلاردى جانە تۇتىنۋشىلاردى بىرىكتىرەدى.