ەل قورعاپ, عۇندار ءمىنىپ ساڭىلاعىن, ساپ قۇرىپ ساقتار جورىتقان ساپ ۇرانىن, وسىناۋ اڭىز دالا دا قازاقتىڭ شاڭىراعىن قورعاپ ءومىر ءسۇرۋدىڭ ءوزى قانداي باقىت؟! تاۋەشكىسىنىڭ ءوزى تاۋىن كۇزەتىپ تۇراتىن بۇل دالا دا ساپقا تۇرىپ ساردار اتانىپ, تىزەسىن تەمىردەن, بۇعاناسىن بۇتاقتان قاتىرعانداي اسكەر بولىپ شىعۋدىڭ ءوزى جۇماققا كىرگەننەن ارتىق مارتەبە ەكەنى اقيقات. مىنە سونداي جۇرەگى وتان دەپ سوققان ماقسۇت نارىكباەۆ اتىنداعى قازاق گۋمانيتارلىق زاڭ ۋنيۆەرسيتەتىنىڭ اسكەري كافەدراسىنىڭ ستۋدەنتتەرى بۇگىن «وتان قورعاۋشى» مونۋمەنتىنىڭ الاڭىندا اسكەري انت قابىلدادى.
ايبىندى انت قابىلداۋ ءراسىمى كورنەكتى مەملەكەت جانە قوعام قايراتكەرى, كەڭەس وداعىنىڭ باتىرى, حالىق قاھارمانى, قازاقستان رەسپۋبليكاسىنىڭ العاشقى قورعانىس ءمينيسترى, ارميا گەنەرالى ساعادات نۇرماعامبەتوۆ 100 جىلدىعىنا وراي جانە اتالعان ۋنيۆەرسيتەتتىڭ 30 جىلدىعى اياسىندا ۇيىمداستىرىلىپ وتىر.
ءىس-شاراعا اسكەري ءبولىم باسشىلىعىنىڭ وكىلدەرى, قر قارۋلى كۇشتەرىنىڭ ارداگەرلەرى جانە ستۋدەنتتەردىڭ اتا-انالارى مەن تۋىستارى قاتىستى.
ەڭ اۋەلى تۋ ۇستاۋشىلار ورتاعا شىقتى. ودان كەيىن روتا كومانديرىنىڭ ارنايى بۇيرىعىمەن ساپتا تۇرعان 121 كۋرسانت اسكەري انت قابىلداۋعا دايىن ەكەندىكتەرىن جەتكىزدى. انت قابىلداۋدىڭ الدىندا ماقسۇت نارىكباەۆ اتىنداعى اتالعان ۋنيۆەرسيتەتتىڭ اسكەري كافەدراسىنىڭ جەتەكشىسى, وتستاۆكاداعى پولكوۆنيك امانگەلدى يبراەۆ جاس ساربازداردى ساپقا تۇرۋىمەن قۇتتىقتاسا, وقۋ جيىنىنىڭ باستىعى پولكوۆنيك, سەرىكحان قايىرحانوۆ ستۋدەنتتەرگە ساتتىلىك تىلەدى.
–اسكەر قاتارىندا قىزمەت ەتىپ, وتان الدىنداعى پارىزدى وتەۋگە ءاربىر ازامات مىندەتتى. سەبەبى, تۋعان جەردى, ەلدى, اتامەكەندى قورعاۋ – قاسيەتتى بورىش. ەر ازامات اسكەرگە بارۋدى ابىرويلى مىندەت رەتىندە سەزىنە وتىرىپ, ەل الدىندا بەرگەن انتتى ورىندايتىن ۇلكەن اسۋ باسپالداعى تۇرعانىن ەستەن شىعارماۋى ءتيىس. ال بۇل قادام اسكەري بورىشتى وتەۋدەن, ال وقۋ ورىندارىندا اسكەري كافەدرادان باستاۋ الادى,–دەدى ول.
سونىمەن قاتار بالالارىنىڭ اسكەري انت قابىلداپ جاتقان ءساتىن كورۋگە كەلگەن اتا-انالار دا ءوز تولقىنىسىن جاسىرمادى.
–اسكەر – مەملەكەتتىڭ تىرەگى, وتان ۇلتتىڭ جۇرەگى. ال سول جۇرەكتى ايالاپ, قورعاۋعا ۇل دا قىز دا مىندەتتى. مەن بۇگىن نەمەرەمنىڭ اسكەر قاتارىندا تۇرىپ انت قابىلداۋىنا كەلىپ وتىرمىن. ونى كىشكەنتاي كەزىنەن باستاپ وتان سۇيگىشتىككە باۋلىدىم. ەندى مىنە سول تاربيەمنىڭ ناتيجەسىن كورىپ قۋانىپ تۇرمىن,–دەيدى استانا قالاسىنىڭ تۇرعىنى بەكمۇرات قۋانىشوۆ.
ءيا, ەر جىگىت ءۇشىن ەلىنىڭ قورعانى بولۋدان ارتىق ارمان جوق. كافەدرانىڭ ساپتىق پلاتستا ساپ تۇزەگەن ءبىلىم الۋشىلارى ەندى 2 جىل اسكەري تارتىپكە ۇيرەتىلەدى. ولارعا جوعارى وقۋ ورنى ديپلومىن الار كەزدە اسكەري بيلەت دە تابىستالاتىن بولادى.
شاپاعات ءابدىر
