جوعارى وقۋ ورىندارى – بولاشاققا باعدار بەرەتىن, كەلەشەككە جول سىلتەيتىن قۇتتى مەكەن. وسى ورتادان تۇلەپ ۇشقان ءاربىر تۇلەك ومىردەن ءوز ەنشىسىن يەلەنۋگە داعدىلانادى. باكالاۆردىڭ ءبىلىمىن العان جاس ماماننىڭ الدىندا تاعى دا ەكى تاڭداۋ تۇرادى. ءبىرى – بىتىرگەن ماماندىعى بويىنشا جۇمىسقا ورنالاسۋ بولسا, ەكىنشىسى – عىلىم جولىن جالعاستىرۋ.
عىلىمنىڭ العاشقى باسپالداعى ول, ارينە, ماگيستراتۋرادان باستالادى. جيىنى التى جىلدا سىڭىرگەن ءبىلىمىن سارالاپ, تاجىريبە الماسۋ ءۇشىن عىلىمي تاعىلىمدامانىڭ ماڭىزى زور. ال عىلىمي تاعىلىمدامانى ەلىمىزدەگى جوعارى وقۋ ورنىنان ءوتۋدىڭ قانداي پايداسى بار؟ جاقسىنى كورمەك جاقسى, كورگەندى كوكىرەككە تۇيمەك جاقسى. شىندىعىندا ماگيسترانتتىڭ كوبى عىلىمي تاعىلىمدامانى شەتەلدەن وتەدى, وعان ارنايى قاراجات تا بولىنەدى. ءدال وسىنداي تاعىلىمدامانى ءوز ەلىمىزدىڭ وزگە وقۋ ورىندارىنان ءوتۋدىڭ دە پايدالى بولاتىنى انىق.
ءال-فارابي اتىنداعى قازاق ۇلتتىق ۋنيۆەرسيتەتى «قازاق ءتىلى مەن ادەبيەتى» ماماندىعىنىڭ ەكىنشى كۋرس ماگيسترانتتارى استانا قالاسىنداعى ا.ق.قۇسايىنوۆ اتىنداعى ەۋرازيا گۋمانيتارلىق ينستيتۋتىنىڭ عىلىمي-زەرتتەۋ ورتالىعىندا 2 اپتا بويى عىلىمي تاعىلىمدامادان وتتىك. ەلورداعا ساپارىمىز ءدارىستىڭ اينالاسىندا شەكتەلمەي, قالانىڭ تاريحي-مادەني وشاقتارىنا باس سۇقتىق. قر ۇلتتىق كىتاپحاناسى, ۇلتتىق مۇراجاي, «ساياسي قۋعىن-سۇرگىن جانە توتاليتاريزم قۇرباندارىنىڭ «الجير» مەموريالدى-مۇراجاي كەشەنى, ءازىربايجان مامبەتوۆ اتىنداعى مەملەكەتتىك دراما جانە كومەديا تەاترى, «جاستار» تەاترى سىندى بىرنەشە جەرمەن تانىسىپ, وتكەنىمىز بەن بۇگىنىمىزدىڭ ساباقتاستىعىنا كۋا بولدىق. بىزگە وسىنداي مۇمكىندىكتەردى جاساعان ەكى وقۋ ورنىنىڭ باسشىلىعىنا العىس ايتا وتىرىپ, تاعىلىمدامادان الار تاعىلىمىمىز مول بولعانىن جەتكىزگىمىز كەلەدى. اتالعان وقۋ ورنىندا «اكادەميالىق جازىلىم» كۋرسى بويىنشا ءدارىس تىڭداپ, قازاق ءتىلىن عىلىم تىلىنە اينالدىرۋ باعىتتارى جونىندە سەمينارعا قاتىستىق, عىلىمي ماقالا جازۋ جونىندە كەڭەستەر الدىق, جاس عالىمدارعا ارنالعان عىلىمي جوبا جۇمىسىن ازىرلەۋ جولدارىمەن تانىستىق. سونىمەن قاتار, جاڭارتىلعان ءبىلىم بەرۋ مازمۇنى بويىنشا قازاق ءتىلى مەن ادەبيەتىن وقىتۋدىڭ بەلسەندى ادىستەرىن ۇيرەندىك.
گۇلجان قيارىستانوۆا,
ءال-فارابي اتىنداعى قازۇۋ-دىڭ ماگيسترانتى
