استانادا جاستار ساياساتى ماسەلەلەرى باسقارماسىنىڭ قولداۋىمەن «تازا قازاقستان. استانا – تازالىق پەن ءتارتىپتىڭ ۇلگىسى» اۋقىمدى ەكواكتسياسى اياسىندا «تازا بەيسەنبى» ءىس-شاراسى ءوتتى. ءىس-شاراعا قاتىسقان «جاسىل ەل» جاستار ەڭبەك جاساقتارى مۇشەلەرى بايقوڭىر اۋدانىنا قاراستى «ءوندىرىس» تۇرعىن الابىنىڭ اۋماعىن كۇل-قوقىستان تازارتىپ, اينالانى اباتتاندىرۋعا اتسالىستى, دەپ حابارلايدى astana-akshamy.kz.
«رەسپۋبليكالىق ستۋدەنتتىك قۇرىلىس جانە جاستار جاساقتارى قوزعالىسى» قوعامدىق قورىنىڭ جەتەكشىسى مارات مۇحامەدجانۇلىنىڭ ايتۋىنشا, تازالىق اكتسياسىنا 100-دەن استام ادام قاتىستى.
«جاسىل ەل» باعدارلاماسىن ىسكە اسىرۋ مەملەكەتتىك جاستار ساياساتىنىڭ نەگىزگى باسىم باعىتتارىنىڭ ءبىرى. ول جاستاردىڭ كۇشىمەن ەلىمىزدى كوگالداندىرۋ, اباتتاندىرۋ ارقىلى ستۋدەنت جاستاردى ەڭبەكپەن قامتاماسىز ەتۋ, جاستار اراسىندا ەكولوگيالىق تاربيەنى ناسيحاتتاۋ جانە دوستىق قارىم-قاتىناستى نىعايتۋ, جاستاردىڭ تابيعاتقا قامقورلىقپەن قاراپ, ءوزىنىڭ جەرىنە, ەلىنە دەگەن سۇيىسپەنشىلىگىن قالىپتاستىرۋ ماقساتىندا ۇيىمداستىرىلىپ ءجۇر. بۇگىنگى ءىس-شارا بارىسىندا ءوندىرىس تۇرعىن الابىنىڭ اينالاسىن تازارتۋ جۇمىستارى جۇرگىزىلدى. ەلوردا تۇرعىندارى, وسكەلەڭ ۇرپاق تابيعي ءونىم تۇتىنىپ, تازا اۋامەن دەمالىپ, ساپالى سۋ ىشكەنىن قالاساق, ەكولوگيالىق سانا مەن مادەنيەتتى قالىپتاستىرۋىمىز كەرەك. ونى اركىم وزىنەن باستاعانى ءجون», – دەدى مارات مۇحامەدجانۇلى.
باس قالانىڭ ەكولوگيالىق جاعدايىن جاقسارتۋ جانە تازالىقتى ساقتاۋ ماقساتىندا ءار اپتا سايىن وتكىزىلەتىن «تازا بەيسەنبى» اكتسياسى اياسىندا ەلوردالىق جۇزدەن استام جاستار اۋماقتىڭ جان-جاعىن رەتكە كەلتىردى.
استاناداعى جاستار ساياساتى ماسەلەلەرى باسقارماسىنىڭ باس مامانى ەرلان نۇرلانۇلى «جاسىل ەل» ساربازدارىنىڭ قاتىسۋىمەن بولعان تازالىق اكتسياسى مادەنيەت پەن ازاماتتاردىڭ قورشاعان ورتاعا دەگەن سانالى كوزقاراسىن قالىپتاستىرۋدى كوزدەيتىنىن اتاپ ءوتتى.
«جاسىل ەل» ەڭبەك جاساقتارى بويىنشا 4200-دەن استام 14 پەن 35 جاس ارالىعىنداعى جاس جۇمىسپەن قامتاماسىز ەتىلەدى. بۇگىن ءبىز «جاسىل ەل» ساربازدارىمەن بىرلەسىپ «استانا – تازالىق پەن ءتارتىپتىڭ ۇلگىسى» اتتى ەكولوگيا اكتسياسى اياسىندا قالا ماڭىنداعى «ءوندىرىس» تۇرعىن الابىنىڭ اينالىسىن رەتكە كەلتىردىك. جاستار ەلوردانى كوگالداندىرۋ جۇمىستارىنا بەلسەنە ارالاسىپ, الاڭداردا, ساياباقتاردا اباتتاندىرۋ, تازالىق جۇمىستارىن جۇرگىزدى. 2005 جىلى قۇرىلعان كوشباسشى ۇيىم بەلسەندى جاستاردى بىرىكتىرىپ, ولاردى ەڭبەككە باۋلۋ, ءپاتروتيزمدى قالىپتاستىرۋعا ۇلەس قوسۋدا. جالپى, «جاسىل ەل» جوباسى 14 پەن 35 ارالىعىنداعى جاستار مەن ستۋدەنتتەردى جۇمىسقا قابىلداۋدا. الەۋمەتتىك جوبا 20 جىلدان بەرى جاستارعا قولداۋ كورسەتىپ كەلەدى. بيىل كوپبالالى الەۋمەتتىك از قامتىلعان وتباسىلاردىڭ بالالارىن جۇمىسپەن قامتۋ كوزدەلىپ وتىر. ولارعا ارنايى كيىم جانە ءبىر ايلىق مولشەردەگى ەڭبەكاقى تولەنەدى. قاتىسۋشىلار جاس ەرەكشەلىكتەرىنە قاراي توپتارعا بولىنەدى. ماسەلەن, 14 جاسقا تولعان وقۋشىلار ءوز مەكتەپتەرىنىڭ ماڭىندا جۇمىس ىستەيدى. ودان بولەك ساياباقتار مەن اعاشتارعا كۇتىم جاساپ, ارامشوپتەرىن تازالايدى, قورشاعان ورتانىڭ كوركەيۋىنە وسىلايشا ءوز ۇلەستەرىن قوسادى. 14 پەن 16 جاس ارالىعىنداعىلار جاس ەرەكشەلىكتەرىنە قاراي اپتاسىنا 5 كۇن, 4 ساعاتتان كەم ەمەس جۇمىسپەن قامتىلادى», – دەدى باس مامان.
«تازا بەيسەنبى» اكتسياسى ءار اپتا سايىن ۇيىمداستىرىلىپ كەلەدى. ول تەك قوقىس جيناۋمەن شەكتەلمەيدى, بۇل اكتسيا جاڭا ەكولوگيالىق ويلاۋدى, حالىقتىڭ ەكولوگيالىق مادەنيەتى مەن مىنەز-قۇلقىن قۇرۋدى, جاڭا ەكولوگيالىق ادەتتەردىڭ پايدا بولۋىن باستاۋعا مۇمكىندىك بەرەدى.
