بۇگىن قر ۇلتتىق اكادەميالىق كىتاپحاناسىندا اقىن, قازاقستاننىڭ ەڭبەك سىڭىرگەن قايراتكەرى ارمان قانيدىڭ تۋعان كۇنىنە وراي «تولقىن-تولقىن جىر تۋار بىزدەن كەيىن» رەسپۋبليكالىق بايقاۋىنىڭ جەڭىمپازدارى مەن جۇلدەگەرلەرىن ماراپاتتاۋ ءراسىمى ءوتتى, دەپ حابارلايدى astana-akshamy.kz.
بۇگىن بەلگىلى اقىن كوزى ءتىرى بولسا 70 جاسقا تولار ەدى. مۇشايراعا ەلىمىزدىڭ ءار وڭىرىنەن 40 جاسقا دەيىنگى 30 اقىن قاتىستى. قازىلار قورىتىندىسى بويىنشا, باس جۇلدەنى الپىسباي حونج يەلەنسە, ءبىرىنشى ورىندى جۇلدىزاي ىسقاق, ەكىنشى ورىندى ايبەك ورالحان, ءۇشىنشى ورىندى ولجاس قاسىم ەنشىلەدى. سونداي-اق امانجول شامكەنوۆ اتىنداعى ارنايى جۇلدە ءبىرجان احمەرگە, مۇزافار الىمباەۆ اتىنداعى سىيلىق ايدانا سەگىزباەۆاعا بەرىلدى. كونكۋرستىڭ جالپى جۇلدە قورى – 1 600 000 تەڭگە. ءىس-شارا بارىسىندا اقىن ارمان قانيدىڭ ءومىرى مەن شىعارماشىلىعىنا ارنالعان كىتاپتار مەن جادىگەرلەر كورمەسى ۇيىمداستىرىلىپ, «تاڭدامالى» شىعارمالار جيناعى تانىستىرىلدى. كىتاپتار قر ۇلتتىق اكادەميالىق كىتاپحاناسىنىڭ قورىنا تابىستالدى.
