تۇتىنۋشىلاردىڭ قۇقىعىن قورعاۋ – قوعامداعى وزەكتى ماسەلەلەردىڭ ءبىرى. ساۋدا-ساتتىق كەزىندە ساپاسىز زات ساتىپ الۋ, تاۋار باعاسىنىڭ دۇرىس كورسەتىلمەۋى سىندى ءتۇرلى جاعدايمەن جىل باسىنان بەرى تۇتىنۋشىلاردان 2103 ءوتىنىش تۇسكەن. ونىڭ ىشىندە «E-otinish» پلاتفورماسى جانە ەلەكتروندىق ۇكىمەت پورتالى ارقىلى – 1542 وتىنىشپەن جۇگىنگەن. بۇل تۋرالى بۇگىن استانا كوممۋنيكاتسيالار ورتالىعىندا وتكەن بريفينگتە استانا قالاسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى باسشىسى ورىنباسارىنىڭ م.ا. مادينا مۋسينا مالىمدەدى, دەپ حابارلايدى astana-akshamy.kz.
جۇمىس بارىسىندا 987 تۇتىنۋشىعا تۇسىنىكتەمە بەرىلسە, 295 ءوتىنىش قۇزىرەتى بويىنشا باسقا مەملەكەتتىك ورگانعا جىبەرىلدى. 260 جاعدايدا تۇتىنۋشىلاردىڭ ماسەلەسى شەشىمىن تاپتى. تۇتىنۋشىلارعا اقشالاي قاراجاتتى قايتارۋ سوماسى – 135 ملن.تەڭگەنى قۇرادى. سونداي-اق, «Telegram Bot» ارقىلى جۇگىنگەن 115 ءوتىنىش بويىنشا تۇتىنۋشىلاردىڭ سۇراقتارىنا تولىقتاي تۇسىنىكتەمەلەر بەرىلدى. ازاماتتاردى جەكە قابىلداۋ بارىسىندا 244 تۇتىنۋشىنىڭ ماسەلەسى تىڭدالدى. جەدەل جەلى تەلەفونىنا 202 تۇتىنۋشىدان قوڭىراۋ ءتۇستى, اربىر سۇراققا دەپارتامەنت تاراپىنان زاڭعا سايكەس كەڭەستەر بەرىلدى. شاعىمدارعا جۇرگىزىلگەن تالداۋ كاسىپكەرلەر تاراپىنان تۇتىنۋشىلاردىڭ قۇقىقتارىن بۇزۋ دەرەكتەرى, بيزنەستىڭ ساپاسىز تاۋارلاردى ساتۋىن, سونداي-اق, ساپاسىز جۇمىستار مەن قىزمەتتەردىڭ دەڭگەيىن كورسەتەدى.
-ماسەلەن, اعىمداعى جىلى ساتۋشىنىڭ (دايىنداۋشىنىڭ, ورىنداۋشىنىڭ) كۇنتىزبەلىك ون كۇن مەرزىمدە تۇتىنۋشىنىڭ شاعىمىنا جازباشا جاۋاپ بەرمەۋ بولىگىندە قۇقىقتارى مەن زاڭدى مۇددەلەرىن بۇزعانى ءۇشىن 65 كاسىپكەر «ەسكەرتۋ» تۇرىندە ءاج-كە تارتىلعان. ەگەر دە كاسىپكەر اكىمشىلىك جازا قولدانىلعاننان كەيىن, ءبىر جىل ىشىندە قايتالاپ جاسالعان جاعدايدا, جەكە تۇلعالارعا – 10, شك سۋبەكتىلەرىنە – 20, وك سۋبەكتىلەرىنە – 30, ىك سۋبەكتىلەرىنە – 50 اەك مولشەرىندە ايىپپۇل سالۋعا اكەپ سوعادى. بۇدان بولەك دەپارتامەنت زاڭعا قايشى ارەكەتتەردىڭ الدىن-الۋ ماقساتىندا تۇتىنۋشىلار اراسىندا ساۋالناما جۇرگىزىپ تۇرادى. بىلتىر ەل بويىنشا 10 مىڭنان استام رەسپوندەنتتەن جاۋاپ الىنىپ, تالداۋ جاسالعان. ساۋالناما قورىتىندىسى بويىنشا تۇرعىندار ءونىم ساپاسى, ونىڭ ىشىندە جارامدىلىق مەرزىمى, ساقتاۋ نورمالارى, زاڭ بويىنشا تالاپ ەتىلەتىن ازىق-تۇلىك تۋرالى اقپاراتتىڭ جوقتىعىنا شاعىمدانعان, – دەدى سپيكەر.
سونداي-اق, قر ساۋدا جانە ينتەگراتسيا مينيسترلىگى قۇرعان شتاب جۇمىسىنىڭ ناتيجەسىندە يمپورتتىق ءونىمنىڭ كوپتەگەن تۇرلەرى زەرتتەلىنىپ, تاماق ونىمدەرىنىڭ قاۋىپسىزدىگى تۋرالى نورماتيۆتەردىڭ بۇزىلۋى انىقتالدى. ناتيجەسىندە مينيسترلىك تاماق ونىمدەرىنىڭ سايكەستىگى تۋرالى دەكلاراتسيالاردىڭ كۇشىن, سايكەستىكتى باعالاۋ تۋرالى قۇجاتتاردىڭ كۇشىن جويادى. 2023 جىلدىڭ سوڭىنان باستاپ ىشكى نارىقتى قورعاۋعا جانە وتاندىق وندىرۋشىلەردى قولداۋعا, سونداي-اق تۇتىنۋشىلاردى قاۋىپسىز جانە ساپالى تاۋارلارمەن قامتاماسىز ەتۋگە باعىتتالعان «ساپالى ءونىم» الەۋمەتتىك جوباسى ىسكە اسىرىلۋدا. زاڭ قوعامدىق بىرلەستىكتەرگە كەلەسى مۇمكىندىكتەردى بەرەدى:
-تاۋاردىڭ تۇتىنۋشىلىق قاسيەتتەرىن زەرتتەۋ;
– تاۋاردىڭ ساپاسى مەن قاۋىپسىزدىگىنە ساراپتاما جۇرگىزۋگە باستاماشىلىق جاساۋ;
– ءونىمنىڭ ساپاسى تۋرالى قوعامدىق پىكىردى انىقتاۋ ءۇشىن حالىققا ساۋالناما جۇرگىزۋ;
– تاۋاردىڭ ساپاسىن باعالاۋ ماقساتىندا مەملەكەتتىك ورگاندارعا جۇگىنۋ;
– تۇتىنۋشىلاردىڭ مۇددەسى ءۇشىن سوتقا تالاپ قويۋ;
– ءونىمنىڭ ساپاسى مەن قاۋىپسىزدىگىن زەرتتەۋ ناتيجەلەرى تۋرالى اقپاراتتى تاراتۋ.
سونىمەن قاتار, وسى فۋنكتسيانى ىسكە اسىرۋ كەزىندە قوعام بەلسەندىلەرى تاۋاردى ساتۋ ورىندارىنا بارعان كەزدە جاسالاتىن بارلىق ارەكەتتەردى فوتو, اۋديو, بەينەتىركەۋدى قولدانۋعا قۇقىلى. 2024 جىلدىڭ مامىر ايىن قوسا العاندا «ساپالى ءونىم» جوباسى اياسىندا قوعامدىق بىرلەستىكتەرمەن جەتى ءونىم اتاۋى بويىنشا زەرتتەۋ جۇرگىزىلىپ, ەكى ونىمنەن زەرتتەۋ ناتيجەسىندە مىسپەن تەمىردىڭ ارتىق مولشەرلەرى تابىلدى. وسى ورايدا ساراپتاما ناتيجەلەرىنىڭ قورىتىنىدىلارى قۇزىرلى ورگاندارعا جولدانىپ, ساتىلىمنان توقتاتۋ جۇمىستارى جۇزەگە اسىرىلادى.
