ءماجىلىس دەپۋتاتتارى كەيبىر زاڭنامالىق اكتىلەرگە سوت جۇيەسىن رەفورمالاۋ جانە پروتسەستىك زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋدى كوزدەيتىن زاڭ جوباسىن ءبىرىنشى وقىلىمدا ماقۇلدادى, دەپ حابارلادى astana-akshamy.kz.
زاڭ جوباسى قىلمىستىق-پروتسەستىك كودەكسكە, ازاماتتىق پروتسەستىك كودەكسكە, اكىمشىلىك راسىمدىك-پروتسەستىك كودەكسكە جانە تاعى بىرقاتار باسقا زاڭعا تۇزەتۋ ەنگىزۋدى كوزدەيدى.
ماجىلىستەگى زاڭناما جانە سوت-قۇقىقتىق رەفورما كوميتەتىنىڭ ءتورايىمى سنەجاننا يماشەۆانىڭ ايتۋىنشا, جوعارعى سوتتاعى كاسساتسيالىق ساتىنىڭ قازىرگى ۇلگىسى ازاماتتاردىڭ سۇرانىسىن تولىق قاناعاتتاندىرمايدى.
«قازىر ازاماتتىق ىستەر بويىنشا تۇسكەن شاعىمدى ءبىر سۋديا قاراپ, ونى ۇشتىككە بەرۋ نەمەسە بەرمەۋ تۋرالى بىرجاقتى شەشىم قابىلدايدى. سالدارىنان ازاماتتىق جانە قىلمىستىق ىستەردىڭ تەك 5%-ى عانا كاسساتسيالىق قايتا قاراۋعا جەتەدى. جاڭا مودەل ەلوردادا ءۇش كاسساتسيالىق سوتتى, ياعني قىلمىستىق, ازاماتتىق جانە اكىمشىلىك ىستەر بويىنشا سوتتاردى قۇرۋدى كوزدەيدى», — دەدى دەپۋتات.
وسى زاڭ جوباسىن پىسىقتاعان جۇمىس توبىنىڭ قاراۋىنا مىنانداي ۇسىنىستار ەنگىزىلگەن:
— كاسساتسياعا ىستەر الدىن الا قاراۋسىز ءۇش سۋديادان تۇراتىن القاعا تىكەلەي تۇسەتىن بولادى;
— كاسساتسيالىق سوتتا ىستەردى قاراۋ مەرزىمى 6 ايدان اسپايدى;
— سوت پروتسەسى تاراپتاردى شاقىرا وتىرىپ, اۋىزشا جۇرگىزىلەدى.
«كاسساتسيالىق سوتتاردىڭ قۇرىلۋىمەن جوعارعى cوتتىڭ ءرولى دە وزگەرەدى. ونىڭ جۇمىسى سوت پراكتيكاسىنىڭ بىركەلكىلىگىن قامتاماسىز ەتۋگە باعىتتالادى. سوت اكتىلەرىن جوعارعى سوت سۋدياسىنىڭ ۇسىنۋى بويىنشا ەرەكشە جاعدايلاردا جوعارعى سوتتا قايتا قاراۋ مۇمكىن بولادى. ۇسىنىلعان جاڭا مەحانيزم جوعارعى سوت توراعاسىنىڭ ۇسىنىسى ينستيتۋتىن اۋىرتپالىقسىز جويۋعا مۇمكىندىك بەرەدى. رەفورمانىڭ ىرگەلى سيپاتىن ەسكەرە وتىرىپ, ونى ىسكە قوسۋ مەرزىمىن 2025 جىلدىڭ 1 شىلدەسىنەن باستاپ ىسكە اسىرۋ ۇسىنىلادى. جاڭا سوت رەفورماسى قولدانىستاعى شتات سانىن كەڭەيتۋسىز جانە قوسىمشا قارجىلىق شىعىندارسىز جۇزەگە اسىرىلادى», — دەدى سنەجاننا يماشەۆا.
