قازاقستان رەسپۋبليكاسىنىڭ ۇلتتىق قورعانىس ۋنيۆەرسيتەتىندە ۇجىمدىق قاۋىپسىزدىك تۋرالى شارت ۇيىمى شەڭبەرىندە وتكەن كەزەكتى وتىرىستا ەلەكتروندىق كۇرەستى ۇيىمداستىرۋ جانە ونى جۇرگىزۋ ماسەلەلەرى تالقىلاندى, دەپ حابارلايدى astana-akshamy.kz.
وعان بەلارۋس, قازاقستان, قىرعىزستان, رەسەي جانە تاجىكستان قورعانىس ۆەدومستۆولارىنىڭ راديوەلەكتروندىق كۇرەس باسقارما ورگاندارىنىڭ باسشىلارى قاتىستى.
قر قارۋلى كۇشتەرى باس شتابى باستىعىنىڭ ورىنباسارى گەنەرال-مايور فازىلوللا بادەنوۆ كەزدەسۋگە قاتىسۋشىلارعا ارناپ ءسوز سويلەدى.
جۇمىس توبىنىڭ مۇشەلەرى قازىرگى زامانعى قارۋلى قاقتىعىستاردا ەلەكتروندىق كۇرەس كۇش-قۇرالدارىن قولدانۋ تاجىريبەسىن جانە مۇشە ەلدەردىڭ قارۋلى كۇشتەرىن ۇيلەسىمدى تەحنيكالىق ۇلگىلەرمەن جاراقتاندىرۋ پەرسپەكتيۆالارىن قاراستىردى. وتىرىستا وعان قوسا ۇقشۇ-نىڭ ۇجىمدىق جەدەل ارەكەت ەتۋ كۇشتەرىمەن «ءوزارا ءىس-قيمىل-2023» وقۋ-جاتتىعۋى شەڭبەرىندە ەلەكتروندىق كۇرەس بولىمشەلەرىن بىرلەسىپ قولدانۋدى ۇيىمداستىرۋ ناتيجەلەرى دە ايتىلدى.
تاراپتار راديوەلەكتروندىق كۇرەس سالاسىنداعى ۇيىمنىڭ نورماتيۆتىك قۇقىقتىق بازاسىن ودان ءارى جەتىلدىرۋدى ورىندى دەيدى.
