بۇگىن ەلوردا كوكتال شاعىن اۋدانىندا №24-مامانداندىرىلعان ءورت ءسوندىرۋ ءبولىمى اشىلدى. سالتاناتتى اشىلۋ جانە كىلتتى تابىستاۋ راسىمىنە قر توتەنشە جاعدايلار ءمينيسترى چينگيس ارينوۆ, استانا قالاسىنىڭ اكىمى جەڭىس قاسىمبەك, استانا قالاسى ءماسليحاتىنىڭ توراعاسى ەرلان كاناليموۆ, ازاماتتىق قورعاۋ ورگاندارىنىڭ ارداگەرلەرى, ەلوردالىق تجد باسشىلىعى مەن جەكە قۇرامى قاتىستى, دەپ حابارلايدى astana-akshamy.kz.
جەرگىلىكتى اتقارۋشى ورگانداردىڭ قولداۋىمەن سالىنعان جاڭا ەكى قاباتتى ءورت ءسوندىرۋ ءبولىمىنىڭ جالپى اۋماعى ەكى گەكتاردى قۇرايدى. № 24 مامانداندىرىلعان ءورت ءسوندىرۋ ءبولىمىنىڭ تۇرعىنداردىڭ قاۋىپسىزدىگىن قامتاماسىز ەتۋدىڭ نەگىزگى راديۋسى 55 مىڭعا جۋىق حالىق سانى بار – «كوكتال-1» جانە «كوكتال-2» تۇرعىن الابى.
جاڭا ءورت ءسوندىرۋ دەپوسىندا نەگىزگى جانە ارنايى ماقساتتاعى سەگىز بىرلىك تەحنيكا بار, بۇل اۆتوتسيستەرنا, جىلدام ارەكەت ەتەتىن اۆتوموبيل, بيىكتىگى 32 مەتر اۆتوساتى.
ءورت ءسوندىرۋ ءبولىمىنىڭ نەگىزگى عيماراتىندا ءتورت شىعۋعا ارنالعان بوكس, قىزمەتتىك كابينەتتەر, كەڭەس زالى, وقۋ مۇناراسى, سپورت جانە ويىن الاڭى ورنالاسقان. سونداي-اق, دەپو اۋماعىندا ەلوردالىق گارنيزون قىزمەتكەرلەرى ءۇشىن 18 قىزمەتتىك پاتەرگە ارنالعان جاتاقحانا قاراستىرىلعان.
ءورت ءسوندىرۋ بولىمىمەن تانىسۋ بارىسىندا شاقىرىلعان قوناقتار, ازاماتتىق قورعاۋ ورگاندارىنىڭ ارداگەرلەرى ءبولىمنىڭ فورمۋليارىنا ەستەلىك جازبا قالدىردى.
بۇگىنگى كۇنى استانا قالاسىنىڭ ءورت قاۋىپسىزدىگى 16 بولىمشەنىڭ كۇشىمەن قامتاماسىز ەتىلەدى. ءورت ءسوندىرۋ قىزمەتىنىڭ قارۋىندا 200-دەن استام ءورت ءسوندىرۋ اۆتوتەحنيكاسى بار, كۇن سايىن جەكە قۇرامنىڭ 250-گە جۋىق ادامى تاۋلىكتىك كەزەكشىلىككە تۇسەدى.
