قر باسەكەلەستىكتى قورعاۋ جانە دامىتۋ اگەنتتىگىنىڭ توراعاسى مارات وماروۆتىڭ توراعالىعىمەن جەكەشەلەندىرۋ جونىندەگى ۇلتتىق كەڭسەنىڭ ءبىرىنشى وتىرىسى ءوتتى, دەپ حابارلايدى astana-akshamy.kz.
وندا 2024-2028 جىلدارعا ارنالعان جەكەشەلەندىرۋدىڭ ستراتەگيالىق باعىتتارى مەن تاسىلدەرى بەكىتىلدى. باستامالار ەكونوميكالىق ىرىقتاندىرۋدى جەدەلدەتۋگە, مەملەكەتتىڭ ەكونوميكاداعى ۇلەسىن ازايتۋعا جانە ينۆەستيتسيالار تارتۋعا باعىتتالعان.
تاۋار نارىقتارى مەن كۆازيمەملەكەتتىك سەكتور سۋبەكتىلەرىنە تالداۋ جاساۋ, سونداي-اق جىل سوڭىنا دەيىن جەكەشەلەندىرۋ ءۇشىن مەملەكەتتىك اكتيۆتەردىڭ تىزبەسىن قالىپتاستىرۋ باسەكەلەستىكتى قورعاۋ جانە دامىتۋ اگەنتتىگى جۇرگىزەتىن بولادى. سونىمەن قاتار, اگەنتتىك كەڭسەنىڭ جۇمىس ورگانى رەتىندە جۇمىس ىستەپ, وتىرىستاردى ۇيىمداستىرادى جانە قاجەتتى قۇجاتتاردى دايىنداۋدى ۇيلەستىرەدى. قۇرامىنا پارلامەنت دەپۋتاتتارى, مينيسترلىكتەردىڭ نەگىزگى وكىلدەرى, سونداي-اق ءىرى ۇلتتىق حولدينگتەردىڭ باسشىلارى كىرەدى.
اگەنتتىك توراعاسىنىڭ ورىنباسارى بولات سامبەتوۆ جەكەلەگەن اكتيۆتەردى جەكەشەلەندىرۋ تۋرالى شەشىم قابىلداعانعا دەيىن تاۋار نارىقتارىن تالداۋدان باستاپ جەكەشەلەندىرۋگە دايىندىق ۇدەرىستەرىنە نازار اۋداردى. ول كەڭسەنىڭ نەگىزگى ماقساتى — جەكە كاسىپكەرلىكتى دامىتۋ ءۇشىن جاعداي جاساۋ جانە مەملەكەتتىك سەكتوردى قىسقارتۋ ەكەنىن اتاپ ءوتتى.
بقدا توراعاسىنىڭ ورىنباسارى سونداي-اق اعىمداعى جەكەشەلەندىرۋ پروتسەسىنىڭ پروبلەمالارىنا قاتىستى ماسەلەلەردى قوزعادى. مىسالى, ساتۋعا ارنالعان اكتيۆتەردى انىقتاۋدا ايقىندىقتىڭ بولماۋى جانە پروتسەستەردى وڭتايلاندىرۋ ءۇشىن حالىقارالىق تاجىريبەنى زەردەلەۋ قاجەتتىلىگى.
«كەڭسە قىزمەتىنىڭ ماڭىزدى ماقساتى ەكونوميكالىق كەڭىستىكتى بوساتۋ جانە جەكە كاسىپكەرلىكتىڭ الەۋەتىن تولىققاندى ىسكە اسىرۋ, جەكەشەلەندىرۋدى اياقتاۋ ارقىلى ەكونوميكاداعى مەملەكەتتىك سەكتوردى اۋقىمدى جانە جەدەل قىسقارتۋدى جۇرگىزۋ», – دەدى ب.سامبەتوۆ.
ۇلتتىق كەڭسەنىڭ جۇمىسى جەكەشەلەندىرۋ ءۇشىن مەملەكەتتىك سۋبەكتىلەر مەن اكتيۆتەردىڭ ءتىزىمىن قالىپتاستىرۋدى قوسا العاندا, بىرنەشە كەزەڭدەردە بولىنگەن. بۇل پروتسەسس ەكونوميكانىڭ جالپى تيىمدىلىگىن جاقسارتادى جانە بيزنەسكە اكىمشىلىك قىسىمدى تومەندەتەدى دەپ كۇتىلۋدە.
