ەلوردالىق پوليتسياعا بەلگىسىز ادامنىڭ الاياقتىق ارەكەتتەرى بويىنشا قالا تۇرعىندارىنان بىرنەشە ارىز كەلىپ ءتۇستى. ازاماتتار قاسكۇنەمنىڭ بەرگەن ۋادەسىنە الدانىپ, وعان الدىن الا اقشا بەرگەن, دەپ حابارلايدى astana-akshamy.kz
بەلگىلى بولعانى, جابىرلەنۋشىلەر سايتتان جيھاز جاساۋ تۋرالى حابارلاندىرۋدى كورىپ, شەبەرمەن كەزدەسۋگە كەلىسەدى. مەكەنجايعا كەلگەن ەر ادام جيھاز تۇراتىن جەردى كەسىپ-ءپىشىپ, تۇرعىنداردىڭ سەنىمىنە كىرگەن.
كليەنتتەردەن ول تولىق تولەمنىڭ 50 پايىزىن الدىن الا العان. ونىڭ ۋادەسىنە سەنگەن 63 جاستاعى زەينەتكەر وعان 437 مىڭ تەڭگە بەرگەن.
باسقا جاعدايدا ول 48 جاستاعى ەر ادامدى الداپ, ودان 300 مىڭ تەڭگە كولەمىندە اقشا العان. شەبەر جيھازدى قىسقا مەرزىمدە جاسايمىن دەپ سەندىرىپ, تەلەفونىن ءوشىرىپ, بايلانىسقا شىقپاي قويعان.
جابىرلەنۋشىلەر الدانعانىن سەزىپ, پوليتسياعا ارىزدانعان. سارىارقا اۋداندىق پب كريمينالدىق پوليتسيا ءبولىمىنىڭ قىزمەتكەرلەرى ەر ادامدى انىقتادى.
ول 40 جاستاعى قالا تۇرعىنى بولىپ شىقتى. قازىرگى ۋاقىتتا ونىڭ 7 ادامدى الداعانى بەلگىلى بولدى. سونداي-اق ونىڭ باسقا دا قىلمىسقا قاتىسى بار-جوعى تەكسەرىلىپ جاتىر.
