استانا قالاسى اكىمدىگىنىڭ مۋزىكالىق جاس كورەرمەن تەاترى شىمكەنت شاھارىنا گاسترولمەن باردى. ءبىر اپتالىق ساپار اياسىندا «استانادان شىمكەنتكە سالەم» باعدارلاماسى اياسىندا بەس سپەكتاكل ۇسىنىلدى.
اتاپ ايتقاندا, «گاۋھارتاس», «قوشتاسقىم كەلمەيدى», «اباي-توعجان» مۋزىكالىق درامالارى, «ماحاببات جاعالاۋى» دراماسى جانە «ماحاببات بار ما؟» ليريكالىق كومەدياسى كورەرمەندەردىڭ ۇلكەن قىزىعۋشىلىعىن تۋدىردى. بۇعان قوسا, ا.پۋشكين اتىنداعى قالالىق امبەباپ كىتاپحانادا تەاتر ۇجىمىمەن كەزدەسۋ ۇيىمداستىرىلدى. كەزدەسۋدە اتالمىش تەاتر ديرەكتورى, قازاقستاننىڭ ەڭبەك سىڭىرگەن قايراتكەرى اسحات ماەميروۆ, تەاتر اكتريساسى, كانن فەستيۆالىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى سامال ەسلياموۆا جانە باسقا اكتريسالار مەن اكتەرلەر ونەرسۇيەر قاۋىممەن, وقىرماندارمەن سىرلاستى, ءوز ونەرىن ورتاعا سالدى.
