استاناعا باقىت گۇلى كەلدى

ەركەلەدىم. ەركەسى ەتتى مىنا الەم –

…قۇس جولىمەن جەتەلەيدى ءبىر اۋەن…

مىنا ومىرگە قايتا كەلۋ بۇيىرسا:

مەن ءبارىبىر اقىن بولىپ تۋار ەم,

…ەڭ باقىتتى اقىن بولىپ تۋار ەم! – دەپ جىرلاعان قازاقتىڭ پوەزيا الەمىندە وزىندىك قولتاڭباسى بار گۇلباقىت قاسەن جىرسۇيەر قاۋىمعا ادەمى پويازياسىن پاش ەتىپ, استاناعا كوكتەمنىڭ شۋاعىن الىپ كەلدى.

مەن تۇراتىن جەردىڭ اتى – ساعىنىش,

سەن تۇراتىن ەلدىڭ اتى – ماحاببات.

مەنى وسىرگەن جەردىڭ اتى – مەيىرىم,

سەنى وسىرگەن ەلدىڭ اتى – شاپاعات.

سەن وقىعان كىتاپ اتى – بالالىق,

مەن وقىعان جىردىڭ اتى – سۇلۋلىق,

سەن جازاتىن كىتاپ اتى – جاقسىلىق,

مەن جازاتىن جىردىڭ اتى – جىلىلىق.

مەن تىڭداعان كۇيدىڭ اتى – «اقجاۋىن»,

سەن تىڭداعان ءاننىڭ اتى – «سامال تاۋ»,

مەن شىعارعان كۇيدىڭ اتى – تىنىشتىق,

سەن شىعارعان ءاننىڭ اتى – جانارتاۋ,-دەپ جىرلاعان اقىن, قازاقستان جازۋشىلار وداعىنىڭ مۇشەسى گۇلباقىت قاسەننىڭ تۇرىك تىلىندە شىققان «باقىت گۇلى» كىتابىنىڭ تانىستىرىلىمى ۇلتتىق اكادەميالىق كىتاپحاناسىنا ءوتتى. وعان بەلگىلى قوعام جانە مەملەكەت قايراتكەرلەرى, قالامگەرلەر, سەنات جانە ءماجىلىس دەپۋتاتتارى, ءبىلىم, ونەر سالاسىنىڭ ارداگەرلەرى, باق وكىلدەرى, جۋرناليستەر, وقىرماندار, ستۋدەنت جاستار قاتىستى.

كەش تىزگىنىن ۇستاعان بەلگىلى اقىن داۋلەتكەرەي كاپۇلى استاناعا كوكتەم كەش كەلەتىندىگىن, جەر ءجانناتى – جەتىسۋدان كەلگەن گۇلباقىتتىڭ ەلورداعا ەرەكشە كوكتەمنىڭ لەبىن الا كەلگەندىگىن ايتسا, استانا قالاسى اكىمدىگىنىڭ «جاستار» تەاترىنىڭ جاس اكتەرلارى اقىن ولەڭدەرىن وقىپ, اندەرىن تامىلجىتا ورىندادى.

تۋعان جەرى ايدارلى تۋرالى جىر جازىپ, دانەش راقىشەۆتىڭ اندەرىن تىڭداپ وسكەن گۇلباقىتتىڭ جىر كەشىندە بەلگىلى تەرمەشى, مادەنيەت قايراتكەرى  ەربولات شالدىبەكوۆ «سارى بيداي» ءانىن تامىلجىتا ورىندادى.

كەش الدىندا گۇلباقىتتىڭ تۋعان اپكەسى راۋشان قاسەنوۆامەن از-كەم سۇحباتتاسىپ, اقىن قىزدىڭ تۋىپ-وسكەن ولكەسى, وتباسى جايىندا جىلى ەستەلىكتەر ايتتىق. گۇلباقىتتىڭ كىشىپەيىل, ىزەتتى بولۋى ونىڭ 15 بالا ومىرگە كەلگەن كوپ بالالى وتباسىندا دۇنيەگە كەلگەنىنە بايلانىستى بولسا كەرەك. اناسى سەيىلحان 92 جاستا تالدىقورعانداعى ۇلىنىڭ قولىندا تۇرادى ەكەن.

– انامىز – باقىتىمىزدىڭ قاينار  كوزى, تاتۋ-بىرلىگىمىزدىڭ تۇتقاسى. 15 بالانىڭ قازىر 11-ءى ءتىرىمىز, وتباسىنداعى 5 قىزدىڭ گۇلباقىت ءتورتىنشىسى, ەركەسى. 4 سىنىپتان باستاپ ولەڭ جازا باستادى, كوپ وقيتىن ەدى, ىزدەنۋدەن, ەڭبەكتەنۋدەن جالىقپايتىن, ويتكەنى, ولەڭ جازۋ – ەكىنىڭ ءبىرىنىڭ پەشەنەسىنە جازىلماعان باقىت قوي, ول كوپ ىزدەنىپ,  تەرەڭ ءبىلىم الۋدان جالىقپايتىن. ءار ءسوزى, اقتىلەگى تاعىلىم الارلىق رۋحاني كۇش پەن قايرات بىتىرەتىن انامىزعا گۇلباقىت ولەڭدەرىندە شەكسىز العىسىن ايتادى. شاڭىراعىنىڭ شىراقشىسى, ءىبىلىستى وتباسىنا جولاتپاي قىزعىشتاي قورىعان تەكتى, اۋليە پەيىل انانى ءسىڭلىم وسىلاي اسپەتتەيدى,-دەيدى باۋىرى راۋشان توحتامقىزى.

كەشتە قوناەۆتانۋشى وراز قاۋعاباەۆ اقىن قىزعا تىلەكتەستىگىن بىلدىرسە, ءبىلىم بەرۋ ءىسىنىڭ ۇزدىگى بيجان يگەنباەۆا ءسابي بولمىستى اقىننىڭ بالالار تاقىرىبىنا جازعان ولەڭدەرىن, وسى سالاداعى بىرلەسكەن جوبالارى تۋرالى سۇيسىنە ايتتى, سىڭلىسىنە شىعارماشىلىق تابىس تىلەدى.

استانا مەديتسينالىق كوللەدجىنىڭ ستۋدەنتتەرى اقىننىڭ ولەڭدەرىن وقىسا, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى دۋ قول شاپالاقتاپ, قوشەمەتتەپ وتىردى.

– ولەڭدەرى ليريكاعا, مەيىرىم, ماحابباتقا تولى گۇلباقىتتىڭ پوەزياسى ادامدى ادالدىعىمەن, شىنشىلدىعىمەن, سەزىمگە تولى جىلىلىعىمەن تارتا تۇسەدى. مىنا بۇگىن تۇساۋىن كەسكەن كىتاپ – تۇرىك تىلىنە اۋدارىلعان دۇنيەسى قۇتتى بولسىن, ولەڭىن وقيتىن اۋديتورياسى كەڭ بولسىن, 17 جاسىندا جازعان جالىندى جىرلارىن وسى كەشتە وقىعان جاستار سەكىلدى جاتتاپ وسەر جاس بۋىن وكىلدەر قاتارى كوپ بولسىن دەيمىن,-دەدى اقىن, حالىقارالىق «الاش» سىيلىعىنىڭ لاۋرەاتى باۋىرجان باباجانۇلى.

– جەتىسۋ ءوڭىرىنىڭ زاماناۋي پوەزيا ولكەسىندە بيعايشا مەدەۋوۆا, روزا سەيىلحانقىزى باستاعان ولەڭ كوشىندە گۇلباقىتپەن بىرگە ۇزەڭگىلەس كەلە جاتقان تاناكوز تولقىنقىزى, ىزىنەن ەرگەن ماقپال مىسا, تاعى باسقا ءوسىپ كەلە جاتقان جاس اقىندار – ءبىزدىڭ ۇلگى تۇتار, بەتكە ۇستار ماقتانىشتارىمىز, قادىرلەپ, قۇرمەتتەيتىن ايرىقشا تۇلعالار. مەملەكەتتىك قىزمەتپەن قاتار شىعارماشىلىعىن نىق ۇستاپ الىپ جۇرگەن گۇلباقىت وسى وڭىردە ولەڭ جازاتىن جاستارعا جول كورسەتىپ,  جاس قالام يەلەرىنىڭ ارمانىنا قانات بىتىرگەنى دە ۇلكەن ادامگەرشىلىكتىڭ يەسى ەكەندىگىن اڭعارتقانداي,-دەدى وسى عاجايىپ ولكەنىڭ تۋماسى, ءماجىلىس دەپۋتاتى جاناربەك ءاشىمجان ءوزىنىڭ جۇرەكجاردى سوزىندە.

اقىن تاناكوز تولقىنقىزى گۇلباقىت پوەزياسىنىڭ تۇنىق, تازالىعىن, زامانداسىنىڭ زور ادامگەرشىلىك تۇلعاسىن ناقتى مىسالدارمەن زەردەلەپ, ولەڭدەرىندەگى شىنايىلىقتى ومىردەگى تازا بولمىسىمەن ۇيلەستىرە بىلگەندىگىن تولعانا ءسوز ەتتى.