استانالىق سپورتشىلار اتقا وتىرۋ چەللەندجىن جولدادى

كۇزدە ەلىمىزدە العاش رەت 100-دەن اسا مەملەكەتتىڭ قاتىسۋىمەن دۇنيەجۇزىلىك كوشپەندىلەر ويىنى اياسىندا وتكەن چەللەندجگە 150-گە تارتا سپورت سالاسىنىڭ قىزمەتكەرلەرى مەن قاتار ەلىمىزگە تانىمال بىرقاتار سپورتشىلار دا بوي كورسەتتى. اتاپ ايتار بولساق ۆاسيلي لەۆيت, اقمارال ناۋاتبەك, ەدىگە ەمبەردى, تەمىرلان مۇقاتاەۆ, نۇربەك تالبۋدين جانە ەمما تيسينا سىندى سپورتشىلار.

«اتقا ءمىنۋ — قازاقتا بۇرىننان كەلە جاتقان ءداستۇر. وسىنداي شارانىڭ ءبىر مۇشەسى بولعانىنا وتە قۋانىشتىمىن. قاراپ وتىرسام, تۇلپارعا مىنبەگەنىمە 6 جىلداي ۋاقىت بولىپتى. مەن ءۇشىن ۋاقىت پايدالى ءارى قىزىقتى ءوتتى.

قازىرگى تاڭدا جارتى جىلدان بەرى رەسمي جارىسقا قاتىسپادىم. كىشىگىرىم جاراقاتتارىمدى ەمدەپ, وقۋ-جاتتىعۋ جيىندارىنا قاتىسىپ ءجۇرمىن. كۇزدەگى جاستار اراسىندا وتەتىن نيۋ-يوركتە الەم چەمپيوناتىنا مەن قاراشادا قازاقستان چەمپيوناتىندا باق سىنايمىن» — دەدى, اۋىر اتلەتيكادان جاسوسپىرىمدەر اراسىندا 2 دۇركىن الەم چەمپيونى ەدىگە ەمبەردى.

رەسپۋبليكامىزدا ءبىرىنشى رەت ۇيىمداستىرىلىپ جاتقان شارادا استانالىقتار وزگە وڭىرلەرگە دە وسىنداي چەللەندجدى جولدادى.

«ءبىزدىڭ ۇلتتىق مۇرامىز, اتقا ءمىنۋ مادەنيەتى. بۇگىندە جاستار اراسىندا اتقا ءمىنۋدى كەڭىنەن ناسيحاتتاپ, ۇلتتىق ءداستۇردى دامىتۋعا ەرەكشە نازار اۋدارعانىمىز ارتىق ەمەس.

قازىرگى جاس ۇرپاققا جىلقى تۇلىگى تۋرالى تانىم-تۇسىنىگىن بايىتۋ ولارعا ناسيحاتتاۋ ءۇشىن استانا قالاسىنىڭ سپورت باسقارماسى وسى ءبىر كەرەمەت چەللەندجىن باستاپ وتىر. ءبىز استانا قالاسىنىڭ سپورتشىلارى مەن سپورت سالاسىنىڭ قىزمەتكەرلەرى ايتۋلى «اتقا ءمىنۋ ءداستۇرى» چەللەندجىن ەلىمىزدىڭ بارلىق وبلىستارى مەن الماتى, شىمكەنت قالالارىنا جولدايمىز» – دەيدى استانا قالاسى اكىمدىگىنىڭ «№9 بالالار مەن جاسوسپىرىمدەر سپورت مەكتەبى» كمم باسشىسى ايدىن توقباەۆ.

ۇيىمداستىرۋشىلاردىڭ ايتۋىنشا بۇل ءبىر رەتتىك قانا شارا ەمەس. ەندى ءار سايىن تۇراقتى تۇردە وتەتىن بولادى.

شارا بارىسىندا قاتىسۋشىلار تەك قانا اتقا وتىرۋمەن شەكتەلمەي, ارقان تارتىستان دا سىنعا ءتۇستى. ناتيجەسىندە «تولقىن» سپورت كەشەنىنىڭ قىزمەتكەرلەرى وزگەلەردەن مىقتى ەكەندىگىن كورسەتتى.

جيىن سوڭىندا ارنايى فۋرشەت ۇيىمداستىرىلىپ, بارلىق جينالعان جاندار جاقسى كوڭىل-كۇيمەن ۇيلەرىنە تارقاستى.