قازاقستاندىق اقەركە اسىلبەكوۆا قىتايداعى شانحاي شەت تىلدەرى ۋنيۆەرسيتەتى (Shanghai International Studies University) وتكىزگەن التىنشى كوپتىلدى ىلەسپە اۋدارماشىلار بايقاۋىندا ءبىرىنشى ورىندى جەڭىپ الدى, دەپ حابارلايدى astana-akshamy.kz.
جالپى, بايقاۋ قورىتىندىسىندا 8 ۇمىتكەر 1-ورىن جۇلدەسىن جەڭىپ الدى. سەگىز چەمپيوننىڭ ءبىرى – استانادان بارعان ستۋدەنت اقەركە اسىلبەكوۆا قىتايشا-ورىسشا اۋدارما جانە قىتاي-اعىلشىنشا ىلەسپە اۋدارما بايقاۋلارىندا تاماشا شەبەرلىك كورسەتتى. ول – شانحاي شەت تىلدەر ۋنيۆەرسيتەتىنىڭ كوپتىلدى ىلەسپە اۋدارما بايقاۋى قۇرىلعاننان بەرى العاش رەت چەمپيون اتانعان شەتەلدىك ستۋدەنت.
اقەركە 2017 جىلى شانحايداعى فۋدان ۋنيۆەرسيتەتى باكالاۆرىنا گرانت ۇتىپ الىپ, وقۋعا تۇسكەن. 2021 جىلى ديپلومىن قورعاپ شىعىپ, استاناداعى حقو جۇمىس ىستەپ, 2022 جىلى شانحاي قالاسىنداعى شەت تىلدەر ۋنيۆەرسيتەتىنىڭ قىتاي-ورىس-اعىلشىن تىلدەرى اۋدارماشىسى ماماندىعىنا ماگيستراتۋراعا تۇسەدى. قازىر سوڭعى كۋرستا وقىپ ءجۇر.
ايتا كەتسەك, بايقاۋعا بىرنەشە ەلدىڭ 72 ۋنيۆەرسيتەتىنەن 654 ۇمىتكەر قاتىستى. ونىڭ ىشىندە 128 قاتىسۋشى فينالعا ءوتتى. كونكۋرس ەرەجەلەرى بىرىككەن ۇلتتار ۇيىمىنىڭ جانە باسقا دا حالىقارالىق ۇيىمداردىڭ ىلەسپە اۋدارما ەرەجەلەرىنە سايكەس 9 تىلدە, اتاپ ايتقاندا اراب, فرانتسۋز, نەمىس, جاپون, كورەي, ورىس, يسپان, اعىلشىن جانە قىتاي تىلدەرىندە ىلەسپە اۋدارمانى قامتيدى.
فينالدا قاتىسۋشىلار بەلگىلەنگەن مەرزىمدە الدىمەن شەت تىلىندەگى ءماتىندى قىتاي تىلىنە, سودان كەيىن قالعان ەكى سايىسكەر اۋدارعان قىتاي تىلىندەگى ءماتىندى شەت تىلگە اۋدارۋى قاجەت بولدى. بۇل رەلەلىك اۋدارما ءادىسى ادەتتە حالىقارالىق ۇيىمداردا قولدانىلادى. بايقاۋدا قاتىسۋشىلاردىڭ اۋدارماشىلىق قابىلەتى تەكسەرىلىپ قانا قويماي, سونىمەن قاتار پسيحولوگيالىق كۇيى جانە فيزيكالىق كۇشىن سىنايتىن ناقتى اۋدارما ستسەناريى يميتاتسيالاندى.
بايقاۋدى حالىقارالىق ۋنيۆەرسيتەتتەر اۋدارما ينستيتۋتتارى كونفەدەراتسياسى (CIUTI) مەن قىتاي اۋدارماشىلار قاۋىمداستىعىنىڭ اۋدارما كوميتەتى (TAC) بىرلەسىپ ۇيىمداستىرادى. قازىلار القاسىندا بۇۇ جەنەۆاداعى كەڭسەسى كونفەرەنتسيالاردى باسقارۋ ءبولىمىنىڭ ديرەكتورى ريما ال-چيح (Rima Al-Cheeh), حالىقارالىق اۋدارما ينستيتۋتتارى كەڭەسىنىڭ (CIUTI) پرەزيدەنتى بارت دەفرانك (Bart Defrank) جانە باسقا دا حالىقارالىق ۇيىمداردىڭ باسشىلارى بولدى جانە ولار جەڭىمپازدارعا سەرتيفيكاتتار مەن سىيلىقتاردى تابىس ەتتى.
