ەلوردادا جۇمىسسىز قالا تۇرعىندارىنىڭ جۇمىس تاۋىپ, قارجىلىق جاعدايىن جاقسارتۋعا مۇمكىندىك بەرەتىن «JOLTAP» جوباسى جالعاسىپ جاتىر, دەپ حابارلايدى astana-akshamy.kz.
بۇگىندە جوبا اياسىندا 2 مىڭنان استام ەلوردالىق ءتۇرلى ماماندىق بويىنشا وقىتۋ كۋرستارىنان وتكەن. ال وقىتۋ باعدارلامالارى ەڭبەك نارىعىنىڭ سۇرانىستارىنا سۇيەنە وتىرىپ جاسالعان. ماسەلەن, بۇگىنگى زاماناۋي ماماندىق موبيلوگرافيانى دا جوبا ارقىلى تەگىن وقۋعا بولادى.
بۇل ماماندىقتى مەڭگەرىپ العان جاندار سمارتفون ارقىلى ءساندى فوتو مەن ۆيدەولاردى ءتۇسىرىپ, مونتاجداپ, دايىن كونتەنت جاساي الادى. ال نارىقتا بۇل ماماندىق يەلەرىنىڭ ونىمىنە قىزىعۋشى ادامدار كوپ. «JOLTAP» جوباسىنداعى «موبيلوگرافيا» كۋرسىنىڭ وقىتۋشىسى كامشات قاپاردىڭ سوزىنشە, الەۋمەتتىك جەلىنىڭ ماڭىزدىلىعى ارتقان سايىن SMM مەن موبيلوگراف ماماندىعىنا سۇرانىس كوبەيەدى.
«وسى سالادا جۇرگەنىمە 3 جىلداي بولدى. نەگىزى SMم-موبيلوگراف بولىپ جۇمىس ىستەيمىن. نەگىزگى ماماندىعىم زاڭگەر, بىراق بۇل ماماندىققا قىزىعۋشىلىق بولىپ, قازىرگى تاڭدا ءحوببيىمدى نەگىزگى ماماندىعىما اينالدىردىم دەپ ايتسام بولادى. سەبەبى ماعان فوتو-ۆيدەو ءتۇسىرۋ جانە كۇندەلىكتى الەۋمەتتىك جەلىدە بەلسەندى بولعان ۇنايدى. جالپى قازىر اقپاراتتىق زامان بولعاندىقتان, ادامداردىڭ كوبى الەۋمەتتىك جەلىدە بەلسەندى بولىپ كەلەدى. سوعان ساي قازىر SMM مەن موبيلوگراف ماماندىعىنا سۇرانىس ارتىپ كەلەدى», – دەدى ەلوردالىق وقىتۋشى.
التى كۇندىك «موبيلوگرافيا» كۋرسىندا ماماندىققا كىرىسپە, مونتاجداۋ, زاماناۋي ۆيدەو ءتۇسىرۋ سياقتى تەوريالىق جانە پراكتيكالىق ساباقتار وتەدى. كامشات قاپار ءوز سوزىندە, كۋرس بارىسىندا پراكتيكاعا كوپ ءمان بەرىلەتىنىن اتاپ ءوتتى.
«ءوزىم الەۋمەتتىك جەلىدە بەلسەندىمىن. ارقاشان ماماندىق بويىنشا بلوگ جۇرگىزىپ, ءوزىمنىڭ وقۋشىلارىمنىڭ جەتىستىگىمەن ءبولىسىپ وتىرامىن. سودان دا بولار, ماعان «JOLTAP» جوباسىنا وقىتۋشى بولۋ تۋرالى ءوتىنىش ءتۇستى. جالپى موبيلوگرافيا كۋرسى 6 كۇندىك وقۋدان تۇرادى. العاشقى ساباق «موبيلوگرافياعا كىرىسپە» دەپ اتالدى, وندا وسى ماماندىق تۋرالى تەوريا نەگىزىندە تۇسىندىرەمىن. سوسىن ءفوتوتۇسىرىلىم بويىنشا تاجىريبە بولادى. ەكىنشى كۇنى ۆيدەو ءتۇسىرۋدىڭ قىر-سىرىن ۇيرەتەمىن. وقىتۋ كۋرسىندا پراكتيكاعا كوپ ءمان بەرىلەدى. مونتاج جاساۋ ءادىس-تاسىلدەرىنە دە ءبىر كۇن توقتالامىز. وندا مونتاج جاساۋعا ارنالعان قوسىمشىلارعا توقتالىپ, ساباق بارىسىندا مونتاج جاسايمىز», – دەدى ول.
سونىمەن قاتار كۋرس بارىسىندا اسەرلى جانە زاماناۋي ترەندتەگى ۆيدەولاردى ءتۇسىرۋ ءتاسىلى ۇيرەتىلەدى. كۋرستىڭ سوڭعى ساباعى «مونەتيزاتسيا» دەپ اتالادى. ياعني, وسى سالادا جۇمىس ىستەگىسى كەلەتىن جاندار ءۇشىن قالاي جۇمىسقا ورنالاسۋعا بولادى, جەكە تاپسىرىس بويىنشا فوتو-ۆيدەو ءتۇسىرىلىمدى قانداي باعاعا ۇسىنۋعا بولاتىنى تۋرالى ايتىلادى.
«كۋرستىڭ سوڭعى كۇنى ستۋدەنتتەر تەست تاپسىرىپ, پورتفوليو قورعايدى. سونداي-اق فوتو-ۆيدەولارىن كورسەتەدى. ەگەر بارلىق تاپسىرمانى جاقسى ورىنداسا, وندا كۋرستى اياقتاعانى تۋرالى سەرتيفيكات بەرەمىز. وسى ۋاقىتقا دەيىن موبيلوگرافيا بويىنشا 450-500 ادام وقىپ شىقتى. ونىڭ ىشىندە 300-گە جۋىق وقۋشىنى مەن وقىتتىم. جالپى وسى كۋرسقا ادامداردىڭ قىزىعۋشىلىعى وتە جاقسى دەپ ايتا الامىن. وقۋشىلاردىڭ كوبى ءوز ءىسىن جاڭادان باستاعان كاسىپكەرلەر, دەكرەتتەگى انالار مەن ستۋدەنتتەر», – دەدى ول.
بيىل ەلوردادا وسى جوبا بويىنشا 10 مىڭ تۇرعىندى جاڭا ماماندىقتارعا وقىتۋ جوسپارلانىپ وتىر.
«مەن ءوزىم بۇل جوبانىڭ فاناتىمىن دەپ ايتا الامىن. «JOLTAP» جوباسى جۇمىسسىز ادامدارعا ۇلكەن مۇمكىندىك بەرەدى. جوبا اياسىندا ءتۇرلى كۋرستار بار, ولار قازىرگى زامان تالابىنا نەگىزدەلگەن. سونىڭ ىشىندە وزىنە ۇناعان كۋرستى تاڭداپ, تەگىن وقۋعا بولادى. مىسالى, «موبيلوگرافيا» كۋرسى تۋرالى ايتاتىن بولسام, باسقا جەردە وسى ماماندىققا وقۋ 150-200 مىڭ تەڭگەدەي بولادى. ال بۇل جەردە ءبارىن تەگىن ۇيرەنىپ, سوسىن جۇمىسقا ورنالاسۋعا بولادى. سوندىقتان دا جۇمىسسىز قالا تۇرعىندارىن «JOLTAP» جوباسىنا شاقىرامىز», – دەدى كامشات قاپار.
ايتا كەتەيىك, قاتىسۋشىلاردىڭ تاڭداۋىنا 14 ماماندىق ۇسىنىلعان. ال وقىتۋ باعدارلامالارى ماماندىققا بايلانىستى 2 اپتادان 1 ايعا دەيىن بارىنشا قىسقا مەرزىمدە پراكتيكالىق داعدىلاردى ۇسىنۋعا باعىتتالعان.
