ەلىمىزدە الەۋمەتتىك ازىق-تۇلىك ونىمدەرىنىڭ باعاسى ءتورتىنشى اپتا قاتارىنان تومەندەپ كەلەدى, دەپ حابارلايدى astana-akshamy.kz
ءبىر اپتاداعى الەۋمەتتىك ماڭىزى بار ازىق-تۇلىك باعاسىنىڭ جاعدايى سەنبى, 22 ماۋسىمدا ۆيتسە-پرەمەر سەرىك جۇمانعاريننىڭ توراعالىعىمەن وتكەن ۇكىمەت وتىرىسىندا تالقىلاندى.
10 تاۋار توبىنا باعانىڭ تومەندەۋ ءۇردىسى جالعاسۋدا: قاراقۇمىق جارماسى – 0,9%, كۇنباعىس مايى – 0,5%, قىرىققابات – 0,4%, سيىر ەتى, تۇز جانە قانت – 0,3%, كۇرىش – 0,2%, ماكارون, سۇزبە جانە ۇن – 0,1%. ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا اتاپ وتكەندەي, باعا 8 وبلىستا تومەندەگەن, ونىڭ ىشىندە ۇلىتاۋ (0,8%), اقتوبە (0,6%) جانە اتىراۋ (0,5%) وبلىستارىندا ايتارلىقتاي ارزاندادى. جالپى, ءبىر اپتا ىشىندە الەۋمەتتىك ازىق-تۇلىك باعاسىنىڭ ورتاشا يندەكسىنىڭ تومەندەۋى – 0,1%. بۇل كورسەتكىش ءتورتىنشى اپتا قاتارىنان تىركەلىپ وتىر. ءبىر ايدا ديناميكا 0,3% قۇرادى.
اۋىل شارۋاشىلىعى ۆيتسە-ءمينيسترى ەربول تاسجۇرەكوۆ وڭىرلەردە ەرتە ءونىم جيناۋ كەلىسىمشارتىنىڭ بارىسىن ايتتى. ءۇش مەگاپوليس – استانا, الماتى, شىمكەنت – ماۋسىمارالىق كەزەڭدە كوكونىستەردى تۇراقتى باعامەن جەتكىزۋ ءۇشىن ەلدىڭ جەتى وڭىرىنەن اۋىل شارۋاشىلىعى وندىرۋشىلەرىمەن تىكەلەي كەلىسىمشارتتار جاساي باستادى.
«استانا قازىردىڭ وزىندە 15 مىڭ توننا كوكونىسكە: كارتوپ, پياز, قىرىققابات, سابىزگە فورۆاردتىق كەلىسىمشارتتار جاساستى. شىمكەنت – 7,5 مىڭ تونناعا, الماتى – 16 مىڭ تونناعا. جەتكىزۋ ماۋسىم-شىلدە, قىركۇيەك-ءساۋىر ارالىعىنا جوسپارلانعان. سونداي-اق كۇزگى ءونىمدى جەتكىزۋگە قوسىمشا فورۆاردتىق شارتتار جاسالاتىن بولادى», — دەپ مالىمەت بەردى ۆيتسە-مينيستر.
سونداي-اق ەربول تاسجۇرەكوۆ وڭىرلەرگە الەۋمەتتىك ماڭىزى بار ازىق-تۇلىك تاۋارىنا باعانى تۇراقتاندىرۋ تەتىكتەرىن ىسكە اسىرۋ قاعيدالارىندا بەلگىلەنگەن قارجىلاندىرۋ مەرزىمى مەن شارتتارىن, ونىڭ ىشىندە اۋىل شارۋاشىلىعى تاۋارىن وندىرۋشىلەر مەن قايتا وڭدەۋ كاسىپورىندارىن قارجىلاندىرۋدىڭ 70% باعىتى بويىنشا تالاپتاردى ساقتاۋ قاجەتتىگىن اتاپ ءوتتى.
