31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي ەلىمىزدىڭ ءار اۋماعىندا كوپتەگەن ءىس-شارالار وتكىزىلۋدە. اتاۋلى كۇن قارساڭىندا استانا قالاسىنىڭ بايقوڭىر اۋدانى اكىمى اپپاراتىنىڭ ۇيىمداستىرۋمەن وسى اۋدانداعى مەكتەپ وقۋشىلارىنىڭ «الجير» مەموريالدىق مۇراجاي كەشەنىنە ەكسكۋرسياسى وتكىزىلدى, دەپ حابارلايدى astana-akshamy.kz.
اتاۋلى كۇن 1997 جىلدان باستاپ اتاپ ءوتىلىپ كەلەدى. بۇل داتا قازاقستان ءۇشىن ايرىقشا ماعىناعا يە. «حالىق جاۋلارىن» انىقتاۋ بويىنشا قاتاڭ ساياساتتىڭ سالدارىنان قۋعىن-سۇرگىنگە ۇشىراعانداردىڭ وزدەرى عانا ەمەس, ولاردىڭ جاقىندارى دا زارداپ شەكتى. قازاقستاندا 103 مىڭنان استام ادام قۋعىن-سۇرگىنگە ۇشىرادى, 25 مىڭنان استامى اتۋ جازاسىنا كەسىلدى. ولاردىڭ اراسىندا قازاق زيالىلارى: عالىمدار, مادەنيەت جانە ساياسات سالاسىنىڭ قايراتكەرلەرى بولدى. تاريحىمىزعا وشپەس ءىز قالدىرعان بۇل جىلداردىڭ كورىنىسىن ۇمىتپاۋىمىز كەرەك.
ءىس-شارانىڭ ماقساتى – قانقۇيلى جىلداردىڭ وقيعاسىن, وندا جازىقسىز قۇربان بولعان ازاماتتاردىڭ ەسىمدەرىن ۇمىتپاي, ماڭگى ەستە ساقتاپ, جاس ۇرپاق ساناسىنا بابالار اڭساعان تاۋەلسىزدىكتى, قازاقستانىمىزدىڭ كوركەيىپ, گۇلدەنە تۇسۋىنە ءوز ۇلەستەرىن قوسا وتىرىپ, بەيبىت ءومىردى باعالاي بىلۋگە تاربيەلەۋ.
