كەڭەس اسكەرلەرىنىڭ اۋعانستان جەرىنەن شىعارىلعانىنا 35 جىل. وسى اتاۋلى كۇن قارساڭىندا بايقوڭىر اۋدانى اۋدانى ج.جاباەۆ اتىنداعى №4 مەكتەپ-گيمنازياسىندا اۋعان سوعىسىنىڭ ارداگەرلەرىمەن كەزدەسۋ ءوتتى, دەپ حابارلايدى astana-akshamy.kz.
كەزدەسۋگە زەينەتكەر, تاجىك-اۋعان شەكاراسى اسكەري ءىس-قيمىلدارىنىڭ ارداگەرى مارات تۇراباەۆ, مايور ارمان وسپانوۆ, اۋعان سوعىسىنىڭ ارداگەرى, اسكەري دايىندىق جەتەكشىسى نۇرالى اۋباكىروۆ قاتىستى.
ارداگەرلەرىمىزدىڭ ءاربىر ءسوزى, ءاربىر ءىس-ارەكەتى – كەيىنگى ۇرپاققا ۇلگى. وسى ماقساتتا اۋعان سوعىسى ارداگەرلەرى وزدەرىنىڭ باسىنان وتكەن قيىن-قىستاۋ كۇندەردەن, جاۋىنگەرلىك جىلدارىنان ەستەلىكتەر ايتىپ, اسكەردەگى قىزمەت جولىنان ءبىراز اڭگىمە تارقاتىپ, وقۋشىلاردى وتاندى سۇيۋگە, وعان ادال قىزمەت ەتۋگە شاقىرىپ, جاس ورەندەرىمىزدىڭ پاتريوتتىق سەزىمدەرىن ارتتىرا ءتۇستى.
كەزدەسۋ بارىسىندا بەلسەندى وقۋشىلار اۋعان سوعىسىنا قاتىسقان باتىر جەرلەستەرىمىزگە سۇراقتارىن قويىپ, پىكىر الماستى. سونىمەن قاتار بالالار ءوز ونەرلەرىن ورتاعا سالىپ, جىردان شاشۋ شاشتى.
