بايقوڭىر اۋدانىندا بوگەنباي باتىر داڭعىلى مەن ج. تاشەنوۆ كوشەلەرى بويىنداعى قوعامدىق كەڭىستىكتەردى كەشەندى اباتتاندىرۋ جۇمىستارى جۇرگىزىلۋدە, دەپ حابارلايدى astana-akshamy.kz.
بوگەنباي باتىر داڭعىلى بويىنداعى قوعامدىق كەڭىستىك رەسپۋبليكا داڭعىلىنان ش. ءۋاليحانوۆ كوشەسىنە دەيىنگى ارالىقتى الىپ جاتىر. اتالعان ۋچاسكەدە شامامەن 7000 شارشى مەتر جاياۋ جۇرگىنشىلەر جولى جاڭارتىلادى. 500 مەترگە جۋىق تىرەۋ قابىرعالارىن جابدىقتاۋ, 20-عا جۋىق قوقىس جاشىكتەرى مەن ورىندىقتار ورناتۋ جوسپارلانۋدا. سونداي-اق, جاسىل جەلەكتەر وتىرعىزىلادى.
ج. تاشەنەۆ كوشەسى بويىنداعى قوعامدىق كەڭىستىك – ج. تاشەنوۆ كوشەسى, 13-تەن رەسپۋبليكا داڭعىلىنا دەيىنگى ارالىقتى قامتيدى. بۇل ۋچاسكەدە جاياۋ جۇرگىنشىلەر كەڭىستىگىن جابدىقتاۋ جوسپارلانۋدا, وندا اۋدانى شامامەن 3000 شارشى مەتر اسفالت جابىندى توزعان تروتۋار جوندەلەدى. توزعان اسفالت توسەنىشىنىڭ ورنىنا جاڭا كەسپە تاستار جابىنى سالىنادى. 15-كە جۋىق سىرتقى جيھازدار (قوقىس جاشىكتەرى, ورىندىقتار) ورناتىلادى, سونداي-اق جاسىل جەلەكتەر وتىرعىزىلادى.
