استانادا رەنوۆاتسيا باعدارلاماسى اياسىندا اپاتتى جاعدايداعى تۇرعىن ۇيلەر جاڭاسىنا اۋىستىرىلۋدا, دەپ حابارلايدى astana-akshamy.kz
سوعان سايكەس بايقوڭىر اۋدانىنىڭ تۇرعىندارى زاماناۋي پاتەرلەرگە كوشەتىن بولدى.
جاڭارتۋ بايقوڭىر اۋدانىنىڭ ورتالىق بولىگىندەگى 240 گەكتاردى قامتيدى. ءىرى قۇرىلىس سالۋشىلارمەن ۋاعدالاستىققا قول جەتكىزىلدى. رەنوۆاتسيا باعدارلاماسىنا بىرقاتار ينۆەستورلار تارتىلىپ, ءتيىستى جۇمىستار باستالدى.
بايقوڭىر اۋدانى اكىمدىگىنىڭ وكىلدەرى كاسىپكەرلەرمەن بىرگە اۋدان تۇرعىندارىمەن كەزدەسىپ, وسى جۇمىستاردىڭ اۋقىمىن تالقىلادى.
«ەسكى تۇرعىن ءۇي ماسەلەسىن شەشۋدە كاسىپكەرلەردىڭ الەۋەتىن جۇمىلدىرۋ جانە جەكە قۇرىلىس سالۋشىلاردىڭ ينۆەستيتسيالىق بەلسەندىلىگىن ىنتالاندىرۋ قاجەت. وسىلايشا, اپاتتى جانە توزىعى جەتكەن تۇرعىن ءۇي ماسەلەلەرى بىرلەسكەن كۇش-جىگەرمەن شەشىلەتىن بولادى. ناتيجەسىندە قالانىڭ ورتالىق بولىگىمەن بىرگە ونىڭ شەتى دە داميدى, تيىسىنشە قالانىڭ ەسكى بولىگىنىڭ كەلبەتى دە وزگەرەدى», – دەپ ءتۇسىندىردى استانالىق بايقوڭىر اۋدانىنىڭ اكىمى تالعات راحمانبەردى.
اۋداننىڭ ورتالىق بولىگىن قامتيتىن ءبىرىنشى كەزەڭ ءۇشىن 240 گەكتاردان استام جەر تاڭدالدى. قۇرىلىسقا BI-Group, «موي دوم» جانە Galamart سياقتى ءىرى كومپانيالار قاتىسادى.
ەگەمەن قازاقستان مەن كەنەسارى, يمانوۆ پەن بەيسەكباەۆا, تاحا حۋسەين مەن تاشەنەۆ كوشەلەرىنىڭ قيىلىسىندا جۇمىستار باستالدى.
«قالانى جاقسارتۋدىڭ ماڭىزدى قۇرامداس بولىگى – قالانىڭ ەسكى اۋداندارىن جاڭارتۋعا جانە جاڭعىرتۋعا باعىتتالعان رەنوۆاتسيالىق باعدارلاما, بۇل قالا تۇرعىندارىنىڭ ءومىر ءسۇرۋ ساپاسىن ەداۋىر ارتتىرۋعا مۇمكىندىك بەرەدى», – دەدى «استاناباسجوسپار» عزي ديرەكتورىنىڭ ورىنباسارى, ساۋلەتشى التىنبەك رىسباەۆ.
ايتا كەتەيىك, «استاناباسجوسپار» عزي جشس اۋداندىق اكىمدىكتەرمەن بىرلەسىپ ىسكە اسىراتىن جاڭارتۋ باعدارلاماسى 2024 جىلى 60 اپاتتى ءۇيدىڭ (شامامەن 4200 ادام) تۇرعىندارىن 1400 جاڭا پاتەرگە كوشىرۋدى كوزدەيدى.
جەرگىلىكتى تۇرعىندارمەن كەزدەسۋ بارىسىندا «موي دوم» وكىلى ايبەك ەسەەۆ كومپانيا ولاردىڭ اپاتتىق مۇلكىن ءتيىستى زاڭناما شەڭبەرىندە, باعالاۋدان كەيىن جانە ءوزارا كەلىسىم بويىنشا ساتىپ الۋعا دايىن ەكەنىن اتاپ ءوتتى.
استانانىڭ تۇرعىن ءۇي قورىن جاڭعىرتۋ مەن رەنوۆاتسيانىڭ 2028 جىلعا دەيىنگى مەملەكەتتىك باعدارلاماسى اياسىندا بايقوڭىر اۋدانىندا اسان قايعى كوشەسىندە التى جولاقتى جول سالۋ باسىم باعىت بولىپ سانالادى. جول اممان كوشەسىنەن تاحا حۋسەين كوشەسى ارقىلى الاش تاس جولىنا دەيىن سوزىلادى, ياعني جوعارىدا اتالعان ينۆەستورلاردىڭ كومەگىمەن وڭ جانە سول جاعالاۋدى تىكەلەي بايلانىستىرادى.
ءوز تاراپىنان اۋدان اكىمدىگى ءوز جوبالارىن ىسكە اسىراتىن جانە بايقوڭىر اۋدانىندا جاڭا ينفراقۇرىلىم قالىپتاستىراتىن جەرگىلىكتى نەمەسە شەتەلدىك ينۆەستورلاردى قولداۋعا دايىن ەكەندىگىن ءبىلدىردى.
