ەلورداداعى ماحامبەت وتەمىسۇلى اتىنداعى وقۋشىلار سارايىندا استانا قالاسى ءبىلىم باسقارماسى ادىستەمەلىك ورتالىعىنىڭ ۇيىمداستىرۋىمەن اتا-انالار, ديرەكتوردىڭ تاربيە جۇمىسى بويىنشا ورىنباسارلارى, ادىستەمەلىك بىرلەستىك جەتەكشىلەرى, سىنىپ جەتەكشىلەرى جانە پەداگوگ-پسيحولوگتاردىڭ بالا تاربيەسىنە قاتىستى پسيحولوگيالىق-پەداگوگيكالىق بىلىمدەرىن كوتەرۋ ماقساتىندا «بالا پسيحولوگياسى» قالالىق Psy talks ءوتتى.
قازىرگى كەزدە بالا تاربيەسى, بالا پسيحولوگياسىن جەتىك ءبىلۋ ماسەلەسى وتە وزەكتى. سەبەبى, مەكتەپ پەن اتا-انا اراسىندا بايلانىس ءۇزىلدى. قوعامدا بارلىق ادامدار, سونىڭ ىشىندە اتا-انالار وزدەرى الەۋمەتتىك جەلىگە تاۋەلدى بولىپ كەتكەندەرىن سەزە بەرمەيدى.ۇيدەگى بالا-شاعالارىمەن جەكەلەي پىكىر الىسىپ, سىرلاسىپ وتىرعاننان گورى الەۋمەتتىك جەلىدەگى باسقا ادامداردىڭ ءومىرىن قالت جىبەرمەي, قاداعالاپ وتىراتىن ادامدار كوبەيدى. وسىنداي ولقىلىقتاردىڭ ورنىن تولتىرۋ ماسەلەسى – پەداگوگتار مەن پسيحولوگتاردى الاڭداتادى.
ەلوردادا وتكەن جيىنعا استانا قالاسى ءبىلىم باسقارماسىنىڭ وكىلى, قازاق ۇلتتىق حورەوگرافيا اكادەمياسىنىڭ عالىمدارى, قازاقستاندىق جاس عالىمدار, «Bilim Foundation» قوعامدىق قورىنىڭ وكىلدەرى, ادىستەمەلىك ورتالىقتىڭ ادىسكەرلەرى قاتىستى. سپيكەرلەر قاتىسۋشىلارمەن ديالوگ الاڭىن قۇرىپ, بالا تاربيەسى, بالا پسيحولوگياسىنا قاتىستى سۇراقتارىنا اشىق جاۋاپ بەردى. سونىمەن قاتار, مەكتەپ ديرەكتورى مەكتەپ پەن وتباسىنىڭ بىرلەسكەن ارەكەتى ناتيجەسىندە وقۋشىسىنىڭ جەتكەن جەتىستىگى جايلى وي ءبولىستى.
جيىن بارىسىندا استانا قالاسى ءبىلىم باسقارماسىنىڭ كامەلەتكە تولماعانداردىڭ قۇقىعىن قورعاۋ ءبولىمىنىڭ باسشىسى ديانا امانگەلدىقىزى العى ءسوز سويلەدى. PhD بالابەك ساقتاعانوۆ «تۇلعالىق قۇندىلىقتاردى دامىتۋدىڭ پسيحولوگيالىق اسپەكتىلەرى» تاقىرىبىندا قىزىقتى بايانداما جاسادى.
بالا پسيحولوگياسى ءۇشىن باستى ماسەلە — بالانىڭ پسيحيكالىق دامۋىنىڭ فاكتورلارىن, پسيحيكالىق دامۋ شارتتارىن ءتۇسىندىرۋ بالا پسيحولوگياسىندا جالپى پسيحولوگيانىڭ نەگىزگى ادىستەرى جاس ەرەكشەلىكتەرىنە وراي وزگەرتىلىپ قولدانىلادى. بۇگىنگى تاڭدا بولىپ جاتقان ومىرىمىزدەگى وزگەرىستەرگە بايلانىستى ۇستازدار مەن اتا انالاردىڭ بالا تاربيەلەۋدەگى جاۋاپكەرشىلىگى ارتا تۇسۋدە. ءاربىر ۇستاز اتا انالارمەن قارىم-قاتىناس جاساۋدا ءتۇرلى تاسىلدەردى, قازىرگى جاڭا تەحنولوگيالاردى پايدالانا وتىرىپ, اتا-انانىڭ قىزىعۋشىلىعىن ارتتىرۋ ماقساتىندا جۇمىس جاساسا, اتا انانىڭ مەكتەپكە, ۇستازعا دەگەن كوزقاراسى وزگەرەر ەدى. ەگەمەندى ەلىمىزدىڭ بولاشاعى ءبىلىم مەن تاربيەگە بايلانىستى. ال تاربيەنىڭ باستى ۇياسى وتباسى – مەملەكەتتىڭ نەگىزگى بۋىنى. قوعامداعى وتباسىنىڭ ماقساتى – بالانى دامىتىپ قانا قويماي, ونى ومىرگە دايىنداپ, رۋحاني جاعىنان جەتكىزىپ, تۇلعا رەتىندە قالىپتاستىرۋ,-دەيدى №68 مەكتەپ-گيمنازياسىنىڭ پەداگوگ-پسيحولوگى رايگۇل سايلاۋباەۆا.
– مەن «ينتەرنەت قاۋىپسىزدىگى جانە الەۋمەتتىك جەلىلەردەگى ساقتىق ءىس-شارالارى» تۋرالى سەمينارىنا قاتىستىم, وزىمە قاجەت كوپتەگەن مالىمەتتەر الدىم, جۇمىس بارىسىندا وسى العان ءبىلىمىمدى مىندەتتى تۇردە قولداناتىن بولامىن,- دەيدى وزبەكالى جانىبەكوۆ اتىنداعى № 11 مەكتەپ-ليتسەيىنىڭ تالىمگەرى ديانا ايتجانوۆا.
اتا-انالار ۇيىمداستىرىلعان ءىس-شارادان زاماناۋي بالا پسيحولوگياسى جايلى جاڭا اقپاراتتار الىپ, قىزىقتى تاقىرىپتار توڭىرەگىندە پىكىر الماستى.
