ەلورداداعى №84 «كاۋسار» بالاباقشاسىنىڭ اۋلاسىندا «تاربيە باعى» – باقىتتى بالالىق شاق جاسىل مەكەنى» اتتى ەكسكۋرسيا ءوتتى. ەكسكۋرسيا بارىسىندا بالالارعا بالاباقشا اۋماعىندا ورنالاسقان ادەمى گۇلزارلار, ويىن الاڭدارى, سونداي-اق «ارايلى استانا» مەن «تاربيە باعى» ساياباعى تانىستىرىلدى. باستى ماقسات – بالالاردى گۇلدەردى كۇتىپ باپتاۋعا ۇيرەتىپ, ولاردىڭ بويىندا ادەمىلىك پەن سۇلۋلىق سەزىمىن وياتۋ ارقىلى تابيعاتتى قورعاي بىلۋگە تاربيەلەۋ.
اتالعان بالاباقشادا 2023-2024 جىلعى وقۋ جىلىندا «بالاباقشانى كوگالداندىرۋدا جۇرگىزىلەتىن لاندشافتىق زەرتتەۋلەر» تاقىرىبىندا ەكسپەريمەنتتىك الاڭ اشىلعان بولاتىن. الاڭدى اشۋداعى ماقسات – ايماقتاردى, ويىن الاڭدارىن, گۇلزارلاردى اباتتاندىرۋ جانە ءساندى بەزەندىرۋ.
– لاندشافتىق ديزاين جۇمىسىن ءبىزدىڭ بالاباقشا ۇجىمى جۇرگىزىپ, اۋلادا «اياۋلى استانا» اتتى ساياباق اشىلدى. وعان 70 قاراعاي ەگىلدى. سونىمەن قاتار «تاربيە باعى» الاڭقايىنا 20 ءتۇپ اق قايىڭ جانە 21 ءتۇپ الما اعاشتارى ەگىلدى. وسى اعاشتار تۇبىندە ءتۇرلى وتىرىس پەن ءىس-شارا وتكىزۋ بارىسىندا بالالاردىڭ سول اعاشتاردى كۇتۋگە, ولاردىڭ جىلدان-جىلعا قالاي وسكەنىن باقىلاۋعا ۇيرەتۋ ارقىلى ءوز ەڭبەگىنىڭ جەمىسىن جەۋگە, تابيعاتتى ايالاۋعا تاربيەلەۋ كوزدەلگەن. بۇل جۇمىسقا ءبىزدىڭ بالاباقشانىڭ 300-دەي بالاسى قاتىستى. الداعى ۋاقىتتا دا جوبا جالعاسادى, – دەيدى №84 بالاباقشا ادىسكەرى گۇلدانا مۇراتبەكقىزى.
ەكسكۋرسيا باعدارلاماسى بويىنشا بالالارعا «اتام مەن اجەمنىڭ تاربيە باعىنداعى اق ۇيدە دارۋمەن قوسىلعان تاڭعى اس», «كوڭىلدى اۋەندەر» اتتى تازا اۋاداعى سەرگىتۋ ءىس-شاراسى ۇيىمداستىرىلدى. سونىمەن قاتار الما, اق قايىڭ اعاشتارى ساياسىندا زەرتتەۋ جۇمىسى جۇرگىزىلىپ, «بولاشاق» توبى اۋلاسىنداعى گۇلزارلاردى سۋارۋ, باپتاۋعا ۋاقىت ءبولىندى. «ارايلى استانا» قىلقانجاپىراقتى ساياباقتا ساۋىقتىرۋ شارالارى ءوتىپ, بالالار ماۋەلى ەمەننىڭ اياسىندا وتىرىپ «كىرپىنىڭ ورمانعا ورالۋى» اتتى ەرتەگىنى تاماشالادى. ودان ءارى بالاباقشانىڭ اسەم جەرلەرىن كورىپ, «قۇراق كورپە» گۇلزارىنىڭ جانىندا فوتوعا ءتۇستى.
