دەمالىس كەزىندە بارلىق اتا-انانىڭ بالالارىنا بوس ۋاقىتىن ۇيىمداستىرۋعا مۇمكىندىگى جوق. مۇنداي بالالار كوبىنە ۇيدە وزىمەن-ءوزى قالادى. وسى ۋاقىتتا ەرەسەكتەر بالانىڭ دەمالىس كەزىندە بوس ۋاقىتىن قالاي وتكىزەتىنى تۋرالى ويلانىپ, اڭگىمەلەسىپ, ولارعا ەرەسەكتەر بولماعان كەزدە تۋىنداۋى مۇمكىن ءارتۇرلى توتەنشە جاعدايدا قاۋىپسىز مىنەز-قۇلىق ەرەجەلەرىن ءتۇسىندىرۋى كەرەك.
ەڭ ماڭىزدى ەرەجە – بالا پاتەردە جالعىز قالعاندا, بالانىڭ الۋعا بولمايتىن بارلىق نارسە قولجەتىمدى جەردە بولماۋى كەرەك. پاتەردە ءورتتىڭ, سۋ تاسقىنىنىڭ جانە باسقا دا وقيعالاردىڭ بولماشى مۇمكىندىگىن بولدىرماۋ قاجەت.
ۇيدەن كەتىپ بارا جاتىپ, سىرىڭكە مەن وتتىقتى بالالاردىڭ قولى جەتپەيتىن جەرگە قويىڭىز. سونداي-اق ۇشقىن شامدارىن, حلوپۋشكالار مەن شامداردى, جانعىش سۇيىق زاتتاردى (اتسەتون, بەنزين, الكوگول جانە ت. ب.) بالالاردىڭ قولى جەتپەيتىن جەرلەردە ساقتاڭىز. بالالارعا وتپەن ويناۋ ولاردىڭ ومىرىنە قاۋىپتى ەكەنىن ءتۇسىندىرىڭىز.
بالاڭىزعا ءورت بولعان جاعدايدا ءوزىن قالاي ۇستاعان دۇرىس ەكەنىن ۇيرەتىڭىز. ءورت كەزىندە ءسىز دەرەۋ قۇتقارۋ قىزمەتىنە – «101» نومىرىنە, «112» ۇيالى تەلەفونىنان قوڭىراۋ شالىپ, كورشىلەرىڭىزدى كومەككە شاقىرىپ, تەز ەۆاكۋاتسيالاۋىڭىز كەرەك. بالا سىزبەن نەمەسە جەدەل قىزمەتپەن (پوليتسيا, جەدەل جاردەم, ءورت ءسوندىرۋ ءبولىمى) تەز بايلانىسا الاتىن تەلەفون نومىرلەرىن كوز كورەتىن, ىڭعايلى جەرگە جازۋ كەرەك.
بالالارعا ءورت قاۋىپسىزدىگى ەرەجەلەرى تۋرالى, سونداي-اق ءورت نەمەسە ءتۇتىن بولعان جاعدايدا ءوزىن قالاي ۇستاۋ كەرەگى تۋرالى ءجيى ايتىڭىز. ءورت بولعان جاعدايدا, مۇمكىن بولسا, دەرەۋ پاتەردەن شىعىپ, ءورت سوندىرۋشىلەردى تەلەفون ارقىلى شاقىرا الاتىن كورشىلەرگە حابارلاسىڭىز. ەگەر ءتۇتىن باسپالداق الاڭىنان ەنىپ كەتسە, وندا ەشقانداي جاعدايدا ەسىكتى اشۋعا بولمايدى, ەرەسەكتەرگە قوڭىراۋ شالۋ كەرەك نەمەسە بالكونعا شىعىپ, ءوتىپ بارا جاتقان ادامداردىڭ نازارىن اۋدارۋ كەرەك.
بالالاردى ەلەكتر سىمدارى مەن روزەتكالار قاتتى قىزىقتىرادى. بوس ەلەكتر سىمدارىن جاسىرۋ جانە روزەتكالارعا شتەپسەلدەردى ورناتۋ جەتكىلىكسىز. ءسىز بالاعا ولاردىڭ قاۋىپ-قاتەرى تۋرالى ۇنەمى ەسكە سالىپ, ونى ەلەكتر قۇرىلعىلارىمەن دۇرىس جۇمىس ىستەۋگە بىرتىندەپ ۇيرەتۋىڭىز كەرەك.
بالاڭىزبەن قاۋىپسىزدىك ەرەجەلەرىن ساقتاۋ جونىندە ۇنەمى اڭگىمەلەسىپ وتىرۋعا تىرىسىڭىز. ولارعا كىشكەنتاي ەمتيحاندار ۇيىمداستىرىڭىز, قاتەلىكتەردى بىرگە تالداڭىزدار, تىعىرىقتان شىعۋدىڭ جولىن بىرلەسىپ شەشىڭىزدەر. وقىس وقيعا ورىن العان جاعدايدا نە ىستەۋ كەرەگىن بالالار كىشكەنتاي كەزىنەن ءبىلىپ وسسە دەيمىز.
داريا بايزۋلوۆا,استانا قالاسى تجد الماتى اۋدانى توتەنشە جاعدايلار باسقارماسىنىڭ باس مامانى, ازاماتتىق قورعاۋ لەيتەنانتى
