قازاقستاندا بالالارعا سۋداعى قاۋىپسىزدىك ماسەلەلەرى بويىنشا بەلسەندى تۇردە نۇسقاۋ بەرىلەدى, دەپ حابارلايدى astana-akshamy.kz.
پرەمەر-ءمينيستردىڭ توراعالىعىمەن وتكەن ۇكىمەت وتىرىسىندا ۆەدومستۆو باسشىسى عاني بەيسەمباەۆ وقۋ-اعارتۋ مينيستىرلىگى بالالاردىڭ سۋداعى قاۋىپسىزدىگىن قامتاماسىز ەتۋ بويىنشا قانداي شارالار قابىلداعانىن ايتتى.
مەملەكەتتىك جالپى ءبىلىم بەرۋدىڭ مىندەتتى ستاندارتتارى اياسىندا بالاباقشالاردا ويىن, پراكتيكالىق ساباقتار وتكىزۋ, انيماتسيالىق روليكتەر كورسەتۋ ارقىلى سۋداعى قاۋىپسىزدىك ساباقتارى ءوتتى.
مەكتەپتەردە 4 ءپان بويىنشا جالپى 38 ساباق قاۋىپسىزدىك تاقىرىبىنا ارنالعان. سونىمەن قاتار بيىلعى وقۋ جىلىندا 2 327 ءتيىستى سىنىپ ساعاتى ۇيىمداستىرىلدى.
قاۋىپسىزدىك نۇسقاۋلىقتارى, ونىڭ ىشىندە سۋعا تۇسۋدەگى قاۋىپسىزدىك داعدىلارى قامتىلعان «سەنىڭ قۋانىشقا تولى جازعى دەمالىسىڭ» اتتى GUIDEBOOK مەكتەپ وقۋشىلارىنا تاراتىلدى.
ال, جاڭا وقۋ جىلىنان باستاپ بارلىق مەكتەپتەردە 1-11 سىنىپ وقۋشىلارىنا, سىنىپ ساعاتتارى اياسىندا اپتا سايىنعى قاۋىپسىزدىك ساباقتارى ەنگىزىلەدى.
بۇدان بولەك بيىل وسى تاقىرىپتا سىنىپتان تىس 1852 ينتەراكتيۆتى اشىق ساباق جانە 1162 وقۋ-جاتتىعۋ وتكىزىلدى.
بۇگىندە ءبىلىم بەرۋ ۇيىمدارىندا 10476 قاۋىپسىزدىك بۇرىشتارى ورناتىلعان, 2800 «جاس قۇتقارۋشى» ۇيىرمەلەرى جۇمىس ىستەيدى.
– جاز مەزگىلىندە بارلىق وڭىرلەردە ەملەكەتتىك ورگاندار مەن اكىمدىكتەر وكىلدەرىنىڭ بىرلەسكەن مونيتورينگتىك توپتارى قۇرىلدى. مونيتورينگ توپتار سۋ قويمالارىنىڭ جانىندا ورنالاسقان قالا سىرتىنداعى 31 لاگەرلەر مەن 127 باسسەيندەردى قاۋىپسىزدىك تۇرعىسىنان زەردەلەدى, ولارعا سانيتارلىق باقىلاۋ كۇشەيتىلدى.
– جازعى دەمالىستى ۇيىمداستىرۋشىلارعا ارنالعان بالالار قاۋىپسىزدىگىن قامتاماسىز ەتۋ تاقىرىبىندا رەسپۋبليكالىق 3 سەمينار-كەڭەس وتكىزىلدى.
– جالپى, جازاتايىم وقيعالاردىڭ 95% شومىلۋعا تىيىم سالىنعان جەرلەردە ورىن الادى. وسىعان بايلانىستى مەملەكەتتىك ورگاندار مەن اكىمدىكتەر سۋعا تۇسۋگە تىيىم سالىنعان جانە رۇقسات ەتىلگەن ورىنداردىڭ ءتىزىمىن جاڭارتىپ, قۇتقارۋ كەزەكشىلىگىن ۇيىمداستىرىپ, ەسكەرتۋ بەلگىلەرىن ورناتۋ جۇمىستارىن كۇشەيتۋى قاجەت.
